Typhoon Glenda leaves Naic in state of calamity

Tagpo sa Tulay ng Kay-Alamang habang binabayo ng hangin ni bagyong Glenda na nasa 120kph ang bayan ng Naic.

Matapos ang may sampung oras nang umaalulong at nagngangalit na hanging dala ng bagyong Glenda sa Naic, naiwan ang buong bayan na halos paralisado.

(Basahin ang paghahanda ng Naic para sa bagyong Glenda).

Pananalasa ng bagyong Glenda sa Naic

Gabi pa lamang ng Martes (Hulyo 15) ay laman na ng mga balitaan ang pagtataas ng babala hinggil sa bagyo. Alas-onse ng gabi, tuluyan nang napabilang ang Cavite sa signal number 3. Inaasahang direktang dadaanan ng bagyo ang Cavite sa mga susunod na oras.

Bandang alas-dos ng madaling araw, Miyerkules na (Hulyo 16), nagising ang marami at nagsimulang mangamba ang mga nanatiling gising nang magparamdam na si Glenda. Sumisipol ang hangin nito na naririnig sa iba’t ibang dako ng Naic. Kasunod ng pangamba ay nanalangin ang marami habang nasa kani-kanyang bahay—sa mga kanayunan, kabukiran, pangisdaan, kabayanan, at mga kasuluk-sulukan ng Naic.

Hindi na nakatulog ang marami nang ang umaandap at numinipis na daloy ng kuryente ay tuluyang nawala pagsapit ng pasado alas-tres. Isa na ito sa mga pinakamadidilim na gabi para sa mga taga-Naic. Nagpamalas ng higit pang lakas si Glenda habang naghahari ang karimlan sa bayan. Sa bawat oras na lumilipas ay tila higit pang lumalakas ang hanging dala ng bagyo. Sa mga ulat, tinatayang nasa 120kph ang hanging inihambalos ng bagyo sa Naic. Hindi na lamang sumisipol ang bagyo, inilarawan na ng ilan ang hangin bilang umaalulong.

Sa pagngangalit ng hangin, kasabay na maririnig ang kung anu-anong bagay na inililipad, inihahampas at iwinawasiwas nito. Sa mga kalampag ay maririnig ang ingay ng tila inihataw o inilaglag na timba, tangke ng tubig, yero, alulod, sanga ng puno, palapa ng niyog, buko, tarapal, bintana, at kung anu-ano pa. Habang hindi tiyak ng marami ang delubyo sa dilim, liwanag ng umaga na lamang ang hinihintay ng lahat. Isa na rin ito sa mga pinakamahahabang madaling araw ng mga taga-Naic.

Habang bumabayo ang hangin, tinanggap ng Naic Cavite Online (NCO) ang ulat na walang humpay na ang pagpapatunog ng sirena sa Munting Mapino. Ilang bahay na umano ang buung-buong nilamon ng dagat roon. May ulat ding lumikas na sa isang paaralan ang mga taga-Bucana Sasahan.

Bumagsak ang isang puno ng mangga sa ilang silid-aralan ng Naic Elementary School.

Bumagsak ang isang puno ng mangga sa ilang silid-aralan ng Naic Elementary School.

Nag-aangatan na ang bubong ng ilang kabahayan, habang yaong yari sa magagaang na materyales ay agad nang sinalimpad. May ganitong tagpo sa kabayanan—sa mga kalye ng Gomez, Pelaez at Rizal. May ganito ring tagpo sa mga baryong Bagong Kalsada, Muzon, Malainen at Halang.

Unang oras pa lamang ng bagyo, humapay na ang mahihinang puno gaya ng mga papaya at saging. Iisa ang direksyon ng mga humilig na puno ng saging sa kahabaan ng Sapa at Timalan. Pinakikinggan ng ilan ang langitngit ng mga puno malapit sa kanilang mga bahay. Nabiyak ang isang malaking puno ng mangga sa Naic Elementary School. Habang nanatiling nakatindig ang kalahati nito, bumagsak naman ang kalahati pa sa mga bagong silid-aralan sa eskwelahan. Higit namang mas malaki ang puno ng mangga na buung-buong nabuwal sa buhangin at bumagsak sa kantina at home economics building ng Bancaan Elementary School. Nabuwal din ang matandang puno ng himbabao sa entrada ng Cavite State University Naic (CvSU Naic) at idinamay ang katabing poste ng kuryente. Nangabali ang malalaking sanga at yumukod ang malaking punong nasa tuktok ng Sapa Public Cemetery. Natipak naman ang sementadong lupa na pinagtataniman ng nabunot na puno sa harap ng Everlasting Cemetery. Karaniwan sa halos lahat ng panig ng Naic ang pagkabuwal ng mga puno at poste ng kuryente. Itinago ng karimlan kung papaano nabuwal ang mga puno sa kahabaan ng Calubcob hanggang Palangue, pati na sa Molino at Sabang.

Tumambad ang pinsala ni Glenda

Apat na oras nang humahagupit ang hanging dala ni Glenda. Dala ng puyat at takot ay pagod na ang marami sa Naic. Gayunman, tila hindi pa nauubos ang lakas ng bagyo. Lumiliwanag na at tumatambad na ang lawak at tindi ng pinsala ni Glenda.

Mula sa mga siwang ng bintana ay matutunghayan ang nagkalat na mga dahon at sanga sa daan. May ilang yerong nagkalat. Sa kapitbahayan ay makikita ang naglambiting mga pansol at alulod, natumbang mga antenna, at nangabasag na mga paso ng halaman.

Bago tuluyang humupa ang hangin pasado alas-syete ng umaga, nagpamalas pa ng nag-ibayong lakas si Glenda. Sa siwang ng isang bintana ay makikita ang isang babae sa Kanluran na nakabitin sa pamakuan ng kanyang bahay, tila nakikipag-agawan kay Glenda na iniaangat naman ang kanyang bubungan. Naglaho si Glenda at bumitiw na sa pamakuan ang taga-Kanluran.

Pumayapa ang hangin. Nawala ang ulan at manaka-naka na lamang ang pag-ambon. Sa unang pagsisiyasat ng NCO, natunghayan ang pinsala ng bagyo sa kabayanan. Basag ang ilang ilaw sa liwasan. Wasak ang pansol ng covered court. Bumagsak at nabasag ang imahe ng isang anghel na nasa isang poste sa harap ng simbahan. Bumukas ang bintana ng maliit na simboryo, o iyong mala-dome sa tuktok ng simbahan.

Basag ang isang imahe ng anghel sa simbahan ng Naic matapos itong ilaglag ng hangin ng bagyo.

Basag ang isang imahe ng anghel sa simbahan ng Naic matapos itong ilaglag ng hangin ng bagyo.

Hindi nakaligtas ang mga signboard ng iba’t ibang establisyamento. Basag at bumagsak ang signage ng MCYL Resto Bar. Nalaglag din ang sign board ng McDo sa drive thru nito. Napahiga naman ang mahabang signage ng Eastwest Bank. Isa rin ang ganitong tagpo na karaniwang matutunghayan sa Naic.

Bumigay naman ang ilang pader at bakod dahil sa lakas ng hangin o kaya ay nabagsakan ng mga punong nabuwal. Halimbawa nito ang natibag na pader sa kanto ng Luna, ang nagpira-pirasong adobeng bakod sa Jocson, at ang bakal na bakod sa gilid ng Tulay ng Kay-Alamang.

Sa patuloy na pag-iikot ng NCO, natunghayang natiklap ang mga yero sa likod ng kiskis sa Zamora. Sa Burgos naman ay naabutan ng NCO ang mga kalalakihang tulung-tulong na kinakalas ang isang buong bubong ng garahe, kasama ang pamakuan nito, na bumalandra sa mismong kalye.

Patuloy na tinanggap ng NCO ang mga ulat ukol sa pagbabaha sa Labac. Naglampas tuhod na rin umano ang baha sa may Bancaan. Isang van pa sa Bancaan ang nabagsakan ng puno. Sinalimpad ang ilang bubong sa court ng huling baryong nabanggit. Basag ang mga salaming bintana sa isang gusali ng CvSU Naic. Wasak ang ilang bubong sa San Roque Elementary School. Ilang museleo sa sementeryo sa San Roque ang nasira.

Karaniwan ding tagpo ang pagwawalis ng mga tao sa daan. Tumpuk-tumpok ang naiipong mga dahon. Tinataga ang malalaking punong humarang sa daan. Hinahanap at ibinabalik pauwi ng mga tao ang nilipad nilang mga yero. Kabi-kabila ang pukpukan upang kumpunihin ang mga nasira at mapagtibay pa ang mga bahay.

Habang inaakala ng maraming tapos na ang bagsik ni Glenda, nanumbalik ang pangamba nang bandang alas-nwebe ay lumakas na naman ang hangin. Nagdilim muli ang kaulapan at bumuhos ang malakas na ulan.

Nagbalik si Glenda. Inabot ng bagsik nito ang lupon ng NCO na nangangalap ng ulat sa bayan. Mula sa mga kalye ng Ibayo Silangan, Gomez, Pascual Poblete at Capt. C. Nazareno ay kitang-kita ng NCO kung papaano itinutulak ng hangin ang mga nakaparadang tricycle; napupunit ang may mga pilas ng tarpaulin; kumakalampag ang mga yero; nagbaligtaran ang payong ng mga nasa daan; at nagsikubli sa mga ligtas na lugar ang ilan pang inabutan ng ikalwang bagsik ni Glenda. May mga sandaling walang makikita sa paligid kundi ang namumuting ulan na pinaiikut-ikot at isinasaboy ng hangin kung saan-saan.

Bumalandra sa Burgos ang buong bubong at pamakuan ng isang garahe. Bandang alas-syete na ng umaga nang liparin ito ng hangin.

Bumalandra sa Burgos ang buong bubong at pamakuan ng isang garahe. Bandang alas-syete na ng umaga nang liparin ito ng hangin.

Ligtas na nakabalik pauwi sa kani-kanyang bahay ang nag-ikot na grupo ng NCO. Humahagupit pa rin si Glenda. Tila hindi nauubos ang ulat na tinatanggap ng NCO mula sa iba’t ibang panig ng bayan. Bago mag-alas-diyes, sinasabing nag-high tide at binaha na rin maging ang Balsahan. Kasabay ng rumaragasang tubig sa ilog ang mga kawayan at iba pang uri ng punong nabuwal mula sa mas matatatas na lugar.

Mga bakas ng bagyo

Tanghali na nang tuluyang iwan ni Glenda ang Naic. Subalit ilang oras at araw na ang nakalilipas ay ramdam pa rin ang hagupit at nagkakawing-kawing pang sulirianing iniwan nito.

Sa pagkawala ng kuryente ay labis na nalimitahan ang galaw ng mga taga-Naic. Humina ang supply ng tubig mula sa Nawascor. Hindi rin makahigop ng tubig ang mga gumagamit ng pambombang de-motor. Karaniwang tagpo ang naghahabang pila upang makaigib ng tubig-poso.

Unti-unting naiiga ang baterya ng mga cellphone dahil sa kawalan ng kuryente. Ramdam din ang paghina ng signal ng lahat ng network providers at may mga pagkakataong hindi makatawag o text, at nahuhuli ang dating ng mga ipinapadalang mensahe. Bagsak din ang linya ng Globe landline. Hindi rin mapagana ang internet connections. Iilan na lamang ang nakapag-iinternet, kalimitan ay iyong mga gumagamit ng portable.

Sa unang araw ng bagyo, nasa 90% ng komersyo sa Naic ang paralisado. Sarado ang halos lahat ng establisyamento sa Naic, maliban sa ilang malalaking negosyo gaya ng McDo, Jollibee at 7-11. Generator ang bumuhay sa ilang nagbukas kinabukasan. Gayunman, natunaw na ang mga ice cream. Walang fruit shake sa ilang restaurant. Wala pa ring computer shops. Kinukulang ang mga tinapay, maging kandila, at naghahaba ang pila sa mga gasolinahan. Ang ilang water stations, nagbenta ng kanilang tubig sa halagang 40 pesos mula sa dating 25 pesos. Ipinatong umano nila ang gastos sa krudo ng generator nilang ginagamit. Apektado maging ang mga kubrador ng small town lottery (STL) dahil hindi gumagana ang de-kuryenteng pambola ng STL. Pinakamabenta ang nagbukas na charging stations kung saan 10 hanggang 20 pesos ang bawat oras na pa-charge ng anumang gadget. May isa sa Luna, at may isa sa Rosie’s Mall.

Bumagsak ang matandang puno ng himbabao at dinamay nito ang poste ng Meralco malapit sa CvSU naic.

Bumagsak ang matandang puno ng himbabao at dinamay nito ang poste ng Meralco malapit sa CvSU naic.

Apektado rin ang agrikultura matapos malunod ang maliliit na pananim. Nasira ang magugulang na sanang bunga at halaman. Napilitang anihin ang mga gulay na wala pa sa panahon ng pag-aani. Hindi rin makapag-ayos agad sa bukid ang mga magsasaka dahil inuuna nilang ayusin ang mga bahay na giniba ng bagyong Glenda. Nasira rin ang ilang bangka ng mga mangingisda sa Balsahan. Wala pa ring makalaot hanggang sa kaninang umaga dahil malalaki pa rin ang alon sa dagat.

Hanggang sa Huwebes (Hulyo 17) ay hindi pa rin maayos ang panahon sa Naic. Maya’t mayang nag-iiba ang panahon. Sali’t salitan ang araw at ulan.

Sa mga nabanggit na tagpo ng pananalasa ng bagyong Glenda, kahawig sa ibang bayan at lungsod sa Cavite, kaagad na idineklara ng Kapitolyo ang State of Calamity sa lalawigan. Hanggang sa araw na ito, dalawang araw makalipas ang bagyo ay wala pa ring pasok sa lahat ng antas ng paaralan.

Sa pinakahuling ulat, nagkakuryente na sa Naic bandang alas-dos at kalahati ng hapon. Gayunman, halos ang kabayanan lamang ang nasuplayan ng kuryente at patuloy na nananatiling lukob ng dilim ang maraming baryo. Nagsagawa rin ng relief operation ang Kapitolyo ngayong araw sa Naic.

PAGASA: Signal No. 3 now up over Cavite

Hulyo 16, 2014 (Miyerkules). Sa pinakahuling bulletin ng PAGASA, sinasabing nakataas na ang signal number 3 sa Cavite, kabilang ang iba pang lugar sa Timog Katagalugan, Kabikulan at Metro Manila bunsod ng bagyong Glenda.

Aasahan umano sa signal number 3 ang hanging nasa 101 hanggang 185 na kilometro kada oras. Mararamdaman na umano sa Cavite ang bagsik ni Glenda sa mga susunod na oras. Inihahalintulad ngayon ang bagyong Glenda sa lakas at direksyon ng bagyong Milenyo noong 2006.

Ang inaasahang tatahakin ni bagyong Glenda (may international name na typhoon Rammasun), mula sa). Ang larawan ay mula sa Hong Kong Observatory, halaw sa South China Morning Post Website.

Ang inaasahang tatahakin ni bagyong Glenda (may international name na typhoon Rammasun), mula sa). Ang larawan ay mula sa Hong Kong Observatory, halaw sa South China Morning Post Website.

Mula sa signal number 1 noong Lunes, itinaas kahapon sa signal number 2 ang bagyo sa Cavite. Naranasan ng Naic ang napakalakas na ulan kahapon ng madaling araw. Sinundan ito nang manaka-nakang pag-uulan kinahapunan.

Dahil sa bagyo, sinuspinde ng Kapitolyo ang mga klase mula preschool hanggang high school kahapon. Nagsuspinde rin ng klase ang ilang kolehiyo matapos ang tanghalian, gaya ng Cavite State University Naic, maging ang Polytechnic University of the Philippines sa Maragondon kung saan marami ring nag-aaral mula sa Naic.

Sa pagtaas ng babala ng bagyo, maagang sinuspinde ng Kapitolyo ang pasok sa mga paaralan para sa ngayong araw. Wala nang klase ang mga mag-aaral sa lahat ng antas sa buong lalawigan.

Sa ulat na nasa Facebook page ni Mayor Junio Dualan kahapon, sinasabing pinulong na ni Municipal Administrator Rosalito Senia ang mga pinuno ng iba’t ibang lokal na kagawaran upang maghanda laban sa anumang sakuna gaya ng bagyo at pagtaas ng tubig sa mga tabing dagat.

Karaniwan at kabi-kabilang matutunghayan sa mga social networking sites ang mga paalala upang mag-ingat sa paparating na bagyo. Matatandaang sa mga nagdaang bagyo at unos, madalas na binabaha ang mga baryong kostal ng Naic. Nakararanas rin ng pagbabaha sa mga bahaging tubigan, maging sa kabayanan kung saan nagbabara ang mga imburnal.

Samantala, una na nang ipinaskil sa Facebook ni Mayor Dualan ang ilang mahahalagang numero na dapat tandaan tuwing panahon ng kalamidad, gaya ng mga sumusunod:

  • Fire Station: 412-1481
  • Naic Police Station: 412-0250
  • DRRM Provincial Fax: 571-1845 571-1849 472-1266
  • Nawascor: 412-0026
  • UMC De La Salle Dasmariñas: 481-8000
  • Naic Medicare: 4120312
  • San Lorenzo Ruiz Hospital: 4121763 / 4121411DSWD: 412-2213
  • Municipal Engineering Office: 412-0170
  • Rural Health Unit (Center) 412-0296/5070781
  • Sangguniang Bayan: 686-3184/507-1266

Naic braces for typhoon Glenda

Hulyo 15, 2014 (Martes). Naghahanda na ang Naic sa inaasahang pananalasa ng bagyong Glenda.

Ang inaasahang tatahakin ni bagyong Glenda (may international name na typhoon Rammasun), mula sa). Ang larawan ay mula sa Hong Kong Observatory, halaw sa South China Morning Post Website.

Ang inaasahang tatahakin ni bagyong Glenda (may international name na typhoon Rammasun). Ang larawan ay mula sa Hong Kong Observatory, halaw sa South China Morning Post Website.

Mula sa signal number 1 kahapon, nakataas na ngayon ang signal number 2 ng bagyo sa Cavite. Naranasan ng Naic ang napakalakas na ulan kaninang madaling araw. Sinundan ito nang manaka-nakang pag-uulan kinahapunan. Inaasahan naman ang lubusang pagdaan ng bagyo sa mga susunod na oras.

Dahil sa bagyo, sinuspinde ng Kapitolyo ang mga klase mula preschool hanggang high school ngayong araw. Hapon naman nang magsuspinde na rin ng klase ang ilang kolehiyo gaya ng Cavite State University Naic, maging ang Polytechnic University of the Philippines sa Maragondon kung saan marami ring nag-aaral mula sa Naic.

Sa pagtaas ng babala ng bagyo, muling sinuspinde ng Kapitolyo ang pasok sa mga paaralan bukas. Wala nang klase ang mga mag-aaral sa lahat ng antas sa buong lalawigan.

Sa ulat na nasa Facebook page ni Mayor Junio Dualan kanina, sinasabing pinulong na ni Municipal Administrator Rosalito Senia ang mga pinuno ng iba’t ibang lokal na kagawaran upang maghanda laban sa anumang sakuna gaya ng bagyo at pagtaas ng tubig sa mga tabing dagat.

Karaniwan at kabi-kabilang matutunghayan sa mga social networking sites ang mga paalala upang mag-ingat sa paparating na bagyo. Matatandaang sa mga nagdaang bagyo at unos, madalas na binabaha ang mga baryong kostal ng Naic. Nakararanas rin ng pagbabaha sa mga bahaging tubigan, maging sa kabayanan kung saan nagbabara ang mga imburnal.

Samantala, una na nang ipinaskil sa Facebook ni Mayor Dualan ang ilang mahahalagang numero na dapat tandaan tuwing panahon ng kalamidad, gaya ng mga sumusunod:

  • Fire Station: 412-1481
  • Naic Police Station: 412-0250
  • DRRM Provincial Fax: 571-1845 571-1849 472-1266
  • Nawascor: 412-0026
  • UMC De La Salle Dasmariñas: 481-8000
  • Naic Medicare: 4120312
  • San Lorenzo Ruiz Hospital: 4121763 / 4121411DSWD: 412-2213
  • Municipal Engineering Office: 412-0170
  • Rural Health Unit (Center) 412-0296/5070781
  • Sangguniang Bayan: 686-3184/507-1266

Ang Kasaysayan ng Iglesia ni Cristo sa Naic

Ang kapilya ng Iglesia ni Cristo sa Lokal ng Naic

Ang kapilya ng Iglesia ni Cristo sa Lokal ng Naic

Sa pakikipulong ng Naic Cavite Online (NCO) kasama ang ilang may matataas na katungkulan sa Iglesia ni Cristo (INC) noong 2009, nasariwa ang kasaysayan ng INC sa Naic.

Mula sa tanggapan ng Destinadong Ministro sa Lokal ng Naic sa Ibayo Silangan, nakapulong ng NCO ang Pangulong Diakono I na si Ka Geraldo Novelo, at ang mga Diakonesa na sina Ka Solita Poblete at Ka Marta Malimban. Gabay ang isang lumang aklat-talaan, natunton ang pagsisimula ng INC sa bayan ng Naic.

Mula sa naturang aklat-talaan, tinagurian ang pagdating ng iglesia sa Naic bilang isa sa mga makasaysayang kaganapan para sa INC sa Pilipinas. Dekada ‘20, sa isang pagpupulong sa Salinas-Bacoor na dinaluhan ng isang hindi napangalanang taga-Naic, nahikayat ang naturang Naicqueño sa katuruan ng INC. Ang naturang taga-Naic ay nagpaabot ng kahilingan sa tagapagtatag ng INC na si Ka Felix Manalo upang magkaroon ng lokal ng INC sa sariling bayan.

Taong 1926, ipinadala ni Ka Felix sa Naic si Ka Norberto Cruz upang ganap na mapasimulan ang INC sa bayan. Makalipas ang isang taon, isang banyagang kaanib ang muling ipinadala ni Ka Felix sa Naic at mula noon ay naging madalas na ang mga pagpapalaganap at mga talakayan. Naitala ang 30 katao na unang bumuo sa INC sa Naic. Unang itinuring ang Lokal ng Naic bilang anak ng Lokal ng Bacoor, na sa pasimula ay nasasakop ng Dibisyon ng Maynila.

Sa mga unang taon ng INC sa Naic, wala pang naitatayong bahay-sambahan sa bayan. Ang mga kaanib ng iglesia ay nagtitipon sa bahay ni Ka Maximo Antiojo sa Ibayo Silangan. Noong 1929, inilipat sa bahay ni Ka Vicente Cayde sa Makina ang mga pagtitipon para sa anumang gawaing pang-iglesia. Sa pagtutulung-tulong ng mga kaanib, nakabili ng lupa sa Humbac at naipatayo ang kauna-unahang kapilya ng INC sa Naic noong 1931. Sinasabing semi-concrete na yari sa bato, kahoy at yero, kayang maglaman ng kapilya hanggang sa 200 katao. Binigyang diin sa talaan ng INC na mula sa pagkakaisa ng mga kaanib sa Naic ang pagpapatayo ng kapilya, at walang anumang tulong na nagmula sa Dibisyon. Naitala rin ang pagpapaayos na isinagawa sa naturang kapilya noong 1950. Walang tiyak na halagang naisulat, subalit sinasabing hindi sa kung anumang kasiraan kundi para sa higit na kaayusan ang naturang pagsasaayos.

Sa panukala nina Ka Pablo Yuvienco at Ka Anastacio Arieta, nabigyang-daan ang paglilipat ng kapilya mula sa kabayanan patungo sa kasalukuyang kinaroroonan nito. Taong 1973, sinimulan ang konstruksyon sa Ibayo Silangan na tumagal ng may isang taon. Samantala, itinuturing ngayon bilang isa sa mga mahahalagang araw ng INC sa Naic, ika-6 ng Mayo 1974, pinangunahan at isinagawa ni Ka Eraño Manalo ang “paghahandog” o pagbabasbas sa kapilya.

Sa halos 80 taon ng INC sa Naic, sinasabing makatlong ulit nagkaroon ng malaking pamamahayag sa bayan. Dekada ‘50, ilang araw na naghanda ang mga taga-Naic at ginayakan umanong mabuti ang noon ay kiosko sa lumang liwasan ng bayan. Dinagsa umano ng maraming tao ang pamamahayag na pinamunuan mismo ni Ka Felix. Habang walang malinaw na tala o rekoleksyon ang mga nakapanayam ng NCO hinggil sa ikalwang pamamahayag, mismong ang NCO ang nakapagtala sa huling pamamahayag na isinagawa sa kabayanan. Ika-17 ng Abril 2009, isang grand evangelical mission o GEM ang idinaos sa plaza ng Naic. Dinaluhan muli ng marami, pinangunahan ni Ka Arnel Solano ang naturang pamamahayag.

Bahagi ng paglingon sa kasaysayan ng INC, sinasabing madalas noon ang mga debate sa ilang bahagi ng Naic gaya sa Balsahan, lalo na sa Malainen. Gayunman, maikukumparang patuloy umanong sumisigla ang iglesia sa Naic sa patuloy na paglipas ng panahon. Sa kasalukuyan, ilan sa mga madalas isagawa ng INC ang mga year-end socialization, at pamamahayag kung anibersaryo ng INC.

Sa kasalukuyan, bilang isang sub-distrito ng INC sa lalawigan ng Cavite, may walong lokal ang iglesia sa Naic. Ito ay ang mga lokal ng Naic, Malainen, Halang, Palangue, Labac, Munting Mapino, Muzon, at Bancaan.

 

Naic showers, holds fun run for a cause

Hunyo 24, 2014 (Martes). Sa layong mabigyan ng scholarship ang ilang kabataang Naicqueño, isang fun run ang inilunsad ng liga ng mga baranggay kasabay ng kapistahan ni San Juan.

Kapuputok pa lamang ng araw ay dagsa na ang mga tao sa liwasan. Bago ang ika-6 nang umaga, isang warm up ang isinagawa sa plaza. Sabay-sabay na nag-ehersisyo ang mga tatakbo na nilahukan ng mula sa mga sektor ng edukasyon, pamahalaan, baranggay at pribadong mga mamamayan. Makalipas ang ilang minuto, muling nagkaroon ng maiksing warm up na pinangunahan naman ng mga kapitan ng iba’t ibang baranggay at mga konsehal ng Naic.

DSC08855

Halos mag-iika-7 nang umaga, matutunghayan na ang libu-libong Naicqueño na pumuno sa plaza. Punung-puno rin ng mga tao sa paligid ng liwasan. Hindi mahulugang karayom ang paligid ng mga taong suot ang opisyal na damit para sa fun run.

Mula sa plaza, umusad ang fun run na sa simula ay sinabayan ng masigla at masayang hiyawan. Halos maging fun walk ang fun run matapos halos maglakad ang karamihan. Apat na kilometro ang ruta ng takbuhan na tumahak pa-Capt. C. Nazareno at Santulan, kumaliwa sa Governor’s Drive, lumiko sa pag-itan ng Petron at munisipyo, pumasok sa pangunahing daan ng Ibayo Silangan, at nagwakas muli sa liwasan.

DSC08879

Kaugnay ng kapistahan ni San Juan, tampok sa fun run ang basaan na pinangunahan mismo ng mga bumbero ng Naic. Humimpil at namasa ang mga bumbero sa krosing ng San Roque at Governor’s Drive, sa istasyon nila sa Ibayo, at sa poblasyon. Bukod sa mga bumbero ay namasa rin ang ilang taga-Naic na nasa mga bahayang dinaanan ng takbuhan.

Sayang-saya ang mga nagsilahok habang binabasa. May ilang tila naligo na sa gitna ng bumubuhos na tubig. Hindi nakaligtas ang ilang mga hindi kasapi sa fun run gaya ng mga byahero, nanonood sa daan, at mismong mga nagsasaboy sa mga bahay-bahay matapos silang buhusan na rin ng tubig.

DSC08915

Sa pagwawakas ng fun run sa plaza, halos walang tigil na ang basaan na ang mga buga ng tubig ay nanggagaling na sa kung saan-saang dako. Sa gitna ng palatuntunan, maya’t maya ring sumasaboy ang tubig sa mismong loob ng plaza. Nagmistulang malaking shower room ang buong poblasyon.

Nagkaroon pa ng pa-raffle kung saan marami ang nanalo ng mga appliances, bigas at pera. Pasado ika-9 ng umaga na nang matapos ang mga pagdiriwang.

DSC08985

Tunghayan ang mahigit 200 larawan ng fun run sa Facebook.

Sinasabing gagawin nang taunan ang fun run. Ang kita sa fun run ay gagamitin ng liga ng mga baranggay para sa scholarship ng mga nangangailangang kabataan ng bayan.