Typhoon Glenda leaves Naic in state of calamity

Tagpo sa Tulay ng Kay-Alamang habang binabayo ng hangin ni bagyong Glenda na nasa 120kph ang bayan ng Naic.

Matapos ang may sampung oras nang umaalulong at nagngangalit na hanging dala ng bagyong Glenda sa Naic, naiwan ang buong bayan na halos paralisado.

(Basahin ang paghahanda ng Naic para sa bagyong Glenda).

Pananalasa ng bagyong Glenda sa Naic

Gabi pa lamang ng Martes (Hulyo 15) ay laman na ng mga balitaan ang pagtataas ng babala hinggil sa bagyo. Alas-onse ng gabi, tuluyan nang napabilang ang Cavite sa signal number 3. Inaasahang direktang dadaanan ng bagyo ang Cavite sa mga susunod na oras.

Bandang alas-dos ng madaling araw, Miyerkules na (Hulyo 16), nagising ang marami at nagsimulang mangamba ang mga nanatiling gising nang magparamdam na si Glenda. Sumisipol ang hangin nito na naririnig sa iba’t ibang dako ng Naic. Kasunod ng pangamba ay nanalangin ang marami habang nasa kani-kanyang bahay—sa mga kanayunan, kabukiran, pangisdaan, kabayanan, at mga kasuluk-sulukan ng Naic.

Hindi na nakatulog ang marami nang ang umaandap at numinipis na daloy ng kuryente ay tuluyang nawala pagsapit ng pasado alas-tres. Isa na ito sa mga pinakamadidilim na gabi para sa mga taga-Naic. Nagpamalas ng higit pang lakas si Glenda habang naghahari ang karimlan sa bayan. Sa bawat oras na lumilipas ay tila higit pang lumalakas ang hanging dala ng bagyo. Sa mga ulat, tinatayang nasa 120kph ang hanging inihambalos ng bagyo sa Naic. Hindi na lamang sumisipol ang bagyo, inilarawan na ng ilan ang hangin bilang umaalulong.

Sa pagngangalit ng hangin, kasabay na maririnig ang kung anu-anong bagay na inililipad, inihahampas at iwinawasiwas nito. Sa mga kalampag ay maririnig ang ingay ng tila inihataw o inilaglag na timba, tangke ng tubig, yero, alulod, sanga ng puno, palapa ng niyog, buko, tarapal, bintana, at kung anu-ano pa. Habang hindi tiyak ng marami ang delubyo sa dilim, liwanag ng umaga na lamang ang hinihintay ng lahat. Isa na rin ito sa mga pinakamahahabang madaling araw ng mga taga-Naic.

Habang bumabayo ang hangin, tinanggap ng Naic Cavite Online (NCO) ang ulat na walang humpay na ang pagpapatunog ng sirena sa Munting Mapino. Ilang bahay na umano ang buung-buong nilamon ng dagat roon. May ulat ding lumikas na sa isang paaralan ang mga taga-Bucana Sasahan.

Bumagsak ang isang puno ng mangga sa ilang silid-aralan ng Naic Elementary School.

Bumagsak ang isang puno ng mangga sa ilang silid-aralan ng Naic Elementary School.

Nag-aangatan na ang bubong ng ilang kabahayan, habang yaong yari sa magagaang na materyales ay agad nang sinalimpad. May ganitong tagpo sa kabayanan—sa mga kalye ng Gomez, Pelaez at Rizal. May ganito ring tagpo sa mga baryong Bagong Kalsada, Muzon, Malainen at Halang.

Unang oras pa lamang ng bagyo, humapay na ang mahihinang puno gaya ng mga papaya at saging. Iisa ang direksyon ng mga humilig na puno ng saging sa kahabaan ng Sapa at Timalan. Pinakikinggan ng ilan ang langitngit ng mga puno malapit sa kanilang mga bahay. Nabiyak ang isang malaking puno ng mangga sa Naic Elementary School. Habang nanatiling nakatindig ang kalahati nito, bumagsak naman ang kalahati pa sa mga bagong silid-aralan sa eskwelahan. Higit namang mas malaki ang puno ng mangga na buung-buong nabuwal sa buhangin at bumagsak sa kantina at home economics building ng Bancaan Elementary School. Nabuwal din ang matandang puno ng himbabao sa entrada ng Cavite State University Naic (CvSU Naic) at idinamay ang katabing poste ng kuryente. Nangabali ang malalaking sanga at yumukod ang malaking punong nasa tuktok ng Sapa Public Cemetery. Natipak naman ang sementadong lupa na pinagtataniman ng nabunot na puno sa harap ng Everlasting Cemetery. Karaniwan sa halos lahat ng panig ng Naic ang pagkabuwal ng mga puno at poste ng kuryente. Itinago ng karimlan kung papaano nabuwal ang mga puno sa kahabaan ng Calubcob hanggang Palangue, pati na sa Molino at Sabang.

Tumambad ang pinsala ni Glenda

Apat na oras nang humahagupit ang hanging dala ni Glenda. Dala ng puyat at takot ay pagod na ang marami sa Naic. Gayunman, tila hindi pa nauubos ang lakas ng bagyo. Lumiliwanag na at tumatambad na ang lawak at tindi ng pinsala ni Glenda.

Mula sa mga siwang ng bintana ay matutunghayan ang nagkalat na mga dahon at sanga sa daan. May ilang yerong nagkalat. Sa kapitbahayan ay makikita ang naglambiting mga pansol at alulod, natumbang mga antenna, at nangabasag na mga paso ng halaman.

Bago tuluyang humupa ang hangin pasado alas-syete ng umaga, nagpamalas pa ng nag-ibayong lakas si Glenda. Sa siwang ng isang bintana ay makikita ang isang babae sa Kanluran na nakabitin sa pamakuan ng kanyang bahay, tila nakikipag-agawan kay Glenda na iniaangat naman ang kanyang bubungan. Naglaho si Glenda at bumitiw na sa pamakuan ang taga-Kanluran.

Pumayapa ang hangin. Nawala ang ulan at manaka-naka na lamang ang pag-ambon. Sa unang pagsisiyasat ng NCO, natunghayan ang pinsala ng bagyo sa kabayanan. Basag ang ilang ilaw sa liwasan. Wasak ang pansol ng covered court. Bumagsak at nabasag ang imahe ng isang anghel na nasa isang poste sa harap ng simbahan. Bumukas ang bintana ng maliit na simboryo, o iyong mala-dome sa tuktok ng simbahan.

Basag ang isang imahe ng anghel sa simbahan ng Naic matapos itong ilaglag ng hangin ng bagyo.

Basag ang isang imahe ng anghel sa simbahan ng Naic matapos itong ilaglag ng hangin ng bagyo.

Hindi nakaligtas ang mga signboard ng iba’t ibang establisyamento. Basag at bumagsak ang signage ng MCYL Resto Bar. Nalaglag din ang sign board ng McDo sa drive thru nito. Napahiga naman ang mahabang signage ng Eastwest Bank. Isa rin ang ganitong tagpo na karaniwang matutunghayan sa Naic.

Bumigay naman ang ilang pader at bakod dahil sa lakas ng hangin o kaya ay nabagsakan ng mga punong nabuwal. Halimbawa nito ang natibag na pader sa kanto ng Luna, ang nagpira-pirasong adobeng bakod sa Jocson, at ang bakal na bakod sa gilid ng Tulay ng Kay-Alamang.

Sa patuloy na pag-iikot ng NCO, natunghayang natiklap ang mga yero sa likod ng kiskis sa Zamora. Sa Burgos naman ay naabutan ng NCO ang mga kalalakihang tulung-tulong na kinakalas ang isang buong bubong ng garahe, kasama ang pamakuan nito, na bumalandra sa mismong kalye.

Patuloy na tinanggap ng NCO ang mga ulat ukol sa pagbabaha sa Labac. Naglampas tuhod na rin umano ang baha sa may Bancaan. Isang van pa sa Bancaan ang nabagsakan ng puno. Sinalimpad ang ilang bubong sa court ng huling baryong nabanggit. Basag ang mga salaming bintana sa isang gusali ng CvSU Naic. Wasak ang ilang bubong sa San Roque Elementary School. Ilang museleo sa sementeryo sa San Roque ang nasira.

Karaniwan ding tagpo ang pagwawalis ng mga tao sa daan. Tumpuk-tumpok ang naiipong mga dahon. Tinataga ang malalaking punong humarang sa daan. Hinahanap at ibinabalik pauwi ng mga tao ang nilipad nilang mga yero. Kabi-kabila ang pukpukan upang kumpunihin ang mga nasira at mapagtibay pa ang mga bahay.

Habang inaakala ng maraming tapos na ang bagsik ni Glenda, nanumbalik ang pangamba nang bandang alas-nwebe ay lumakas na naman ang hangin. Nagdilim muli ang kaulapan at bumuhos ang malakas na ulan.

Nagbalik si Glenda. Inabot ng bagsik nito ang lupon ng NCO na nangangalap ng ulat sa bayan. Mula sa mga kalye ng Ibayo Silangan, Gomez, Pascual Poblete at Capt. C. Nazareno ay kitang-kita ng NCO kung papaano itinutulak ng hangin ang mga nakaparadang tricycle; napupunit ang may mga pilas ng tarpaulin; kumakalampag ang mga yero; nagbaligtaran ang payong ng mga nasa daan; at nagsikubli sa mga ligtas na lugar ang ilan pang inabutan ng ikalwang bagsik ni Glenda. May mga sandaling walang makikita sa paligid kundi ang namumuting ulan na pinaiikut-ikot at isinasaboy ng hangin kung saan-saan.

Bumalandra sa Burgos ang buong bubong at pamakuan ng isang garahe. Bandang alas-syete na ng umaga nang liparin ito ng hangin.

Bumalandra sa Burgos ang buong bubong at pamakuan ng isang garahe. Bandang alas-syete na ng umaga nang liparin ito ng hangin.

Ligtas na nakabalik pauwi sa kani-kanyang bahay ang nag-ikot na grupo ng NCO. Humahagupit pa rin si Glenda. Tila hindi nauubos ang ulat na tinatanggap ng NCO mula sa iba’t ibang panig ng bayan. Bago mag-alas-diyes, sinasabing nag-high tide at binaha na rin maging ang Balsahan. Kasabay ng rumaragasang tubig sa ilog ang mga kawayan at iba pang uri ng punong nabuwal mula sa mas matatatas na lugar.

Mga bakas ng bagyo

Tanghali na nang tuluyang iwan ni Glenda ang Naic. Subalit ilang oras at araw na ang nakalilipas ay ramdam pa rin ang hagupit at nagkakawing-kawing pang sulirianing iniwan nito.

Sa pagkawala ng kuryente ay labis na nalimitahan ang galaw ng mga taga-Naic. Humina ang supply ng tubig mula sa Nawascor. Hindi rin makahigop ng tubig ang mga gumagamit ng pambombang de-motor. Karaniwang tagpo ang naghahabang pila upang makaigib ng tubig-poso.

Unti-unting naiiga ang baterya ng mga cellphone dahil sa kawalan ng kuryente. Ramdam din ang paghina ng signal ng lahat ng network providers at may mga pagkakataong hindi makatawag o text, at nahuhuli ang dating ng mga ipinapadalang mensahe. Bagsak din ang linya ng Globe landline. Hindi rin mapagana ang internet connections. Iilan na lamang ang nakapag-iinternet, kalimitan ay iyong mga gumagamit ng portable.

Sa unang araw ng bagyo, nasa 90% ng komersyo sa Naic ang paralisado. Sarado ang halos lahat ng establisyamento sa Naic, maliban sa ilang malalaking negosyo gaya ng McDo, Jollibee at 7-11. Generator ang bumuhay sa ilang nagbukas kinabukasan. Gayunman, natunaw na ang mga ice cream. Walang fruit shake sa ilang restaurant. Wala pa ring computer shops. Kinukulang ang mga tinapay, maging kandila, at naghahaba ang pila sa mga gasolinahan. Ang ilang water stations, nagbenta ng kanilang tubig sa halagang 40 pesos mula sa dating 25 pesos. Ipinatong umano nila ang gastos sa krudo ng generator nilang ginagamit. Apektado maging ang mga kubrador ng small town lottery (STL) dahil hindi gumagana ang de-kuryenteng pambola ng STL. Pinakamabenta ang nagbukas na charging stations kung saan 10 hanggang 20 pesos ang bawat oras na pa-charge ng anumang gadget. May isa sa Luna, at may isa sa Rosie’s Mall.

Bumagsak ang matandang puno ng himbabao at dinamay nito ang poste ng Meralco malapit sa CvSU naic.

Bumagsak ang matandang puno ng himbabao at dinamay nito ang poste ng Meralco malapit sa CvSU naic.

Apektado rin ang agrikultura matapos malunod ang maliliit na pananim. Nasira ang magugulang na sanang bunga at halaman. Napilitang anihin ang mga gulay na wala pa sa panahon ng pag-aani. Hindi rin makapag-ayos agad sa bukid ang mga magsasaka dahil inuuna nilang ayusin ang mga bahay na giniba ng bagyong Glenda. Nasira rin ang ilang bangka ng mga mangingisda sa Balsahan. Wala pa ring makalaot hanggang sa kaninang umaga dahil malalaki pa rin ang alon sa dagat.

Hanggang sa Huwebes (Hulyo 17) ay hindi pa rin maayos ang panahon sa Naic. Maya’t mayang nag-iiba ang panahon. Sali’t salitan ang araw at ulan.

Sa mga nabanggit na tagpo ng pananalasa ng bagyong Glenda, kahawig sa ibang bayan at lungsod sa Cavite, kaagad na idineklara ng Kapitolyo ang State of Calamity sa lalawigan. Hanggang sa araw na ito, dalawang araw makalipas ang bagyo ay wala pa ring pasok sa lahat ng antas ng paaralan.

Sa pinakahuling ulat, nagkakuryente na sa Naic bandang alas-dos at kalahati ng hapon. Gayunman, halos ang kabayanan lamang ang nasuplayan ng kuryente at patuloy na nananatiling lukob ng dilim ang maraming baryo. Nagsagawa rin ng relief operation ang Kapitolyo ngayong araw sa Naic.

Naic parks, streets, buildings get makeover

Milyun-milyong piso ang tinatayang ginugol at patuloy na ginugugol ng pamahalaang lokal para sa mga pagawaing bayan ngayong 2013.

Ang kasalukuyang anyo ng binagong Lovers' Park (ABC Hall) sa poblasyon ng Naic.

Ang kasalukuyang anyo ng binagong Lovers’ Park (ABC Hall) sa poblasyon ng Naic.

Habang ang unang yugto ng taon ay nasa ilalim pa ni Mayor Edwina Mendoza, ang paglalagay ng CCTV camera sa poblasyon ang maituturing na isa sa mga natatanging pagbabago sa kabayanan. Matutunghayan din sa administrasyong Mendoza ang pagpapatuloy ng mga proyektong pagawain sa mga baryo at ilang kanayunan.

Bakas na bakas naman sa panunungkulan ni Mayor Junio Dualan ang pagbabagong mukha ng poblasyon dahil sa pagsasabagong-anyo ng Lovers’ Park o higit na kilala bilang ABC Hall. Pinasimulan ang pagawain noong ika-4 ng Nobyembre at inihabol matapos hanggang pistang bayan. Sa mga ulat ni Mayor Junio Dualan sa Naic, sinabi niyang ilalapit o ihahalintulad sa disenyo ng simbahan ang bagong bihis na Lovers’ Park. Paraan umano ito ng pamahalaang lokal upang maganyak pa ang mga turista na dalawin ang bayan.

Bahagi pa ng mga ulat ni Mayor Dualan, isinagawa o di kaya ay nakalinya na umano ang pagsesemento ng daan sa Ibayo Silangan patungong palengke, pagpapagana sa grand central terminal, paglilipat ng isang gusali ng pamilihang bayan sa loob ng terminal, multipurpose hall sa Bucana Elementary School, mga silid-aralan sa Sabang Elementary School, dalawang silid-aralan din sa isang paaralan sa Villa Apolonia, pag-aaspalto sa poblasyon, pagsesemento ng daan sa Kalye Seaman sa Bancaan, pagpapaayos sa plaza, pagpapalapad ng daan sa Sabang at Malainen, at pagbabagong mukha ng munisipyo upang makatawag pa ng ibang mga magnenegosyo.

 

On hero’s 150th birthday: “Byaheng Bonifacio” is byaheng Naic

Kaugnay ng ika-150ng kaarawan ni Andres Bonifacio ngayong 2013, inilunsad ng Department of Tourism (DOT) at National Historical Commission of the Philippines (NHCP) ang “Biyaheng Bonifacio: Biyaheng Bayani ng Bayan.” Kinampanya sa proyekto ang pagbisita sa 16 na lugar na itinuturing na may malaking papel sa buhay ni Bonifacio. Kabilang sa mga naturang lugar ang Casa Hacienda de Naic (Naic Elementary School ngayon) kung saan naganap ang Naic Military Agreement, pag-bartolina at unang bahagi ng paglilitis kay Bonifacio.

Ang kasalukuyang itsura ng Casa Hacienda de Naic, kuha nito lamang Disyembre 2013.

Sinasabing layon ng proyekto na pataasin ang interes ng publiko tungkol sa rebolusyonaryong bayani na si Bonifacio. Ayon kay Ryan Sebastian, Tourism Operation Officer II at isa ring taga-Naic, sa ulat ng Philippine Star noong Marso, “We need to promote and preserve our cultural heritage. People who live in places visited by Bonifacio must feel that their places are important, because through this they develop a pride in their place.”

Dalawang Naicqueño ang nakabilang sa unang 20ng nakatapos sa “Biyaheng Bonifacio.” Kasama sa mga pinarangalan ng DOT at NHCP sina Harvey Poblete at Erwin Bisain noong ika-6 ng Hunyo. Tumanggap ng katibayan at regalo sina Poblete at Bisain sa awarding ceremony na idinaos sa NHCP sa Maynila. Kinapanayam pa si Bisain, ika-siyam na nakatapos ng byahe sa buong bansa, para sa balitaang State of the Nation with Jessica Soho ng Channel 11 noong ika-26 ng Nobyembre. Bahagi pa rin ito sa pagdiriwang ng kaarawan ni Bonifacio.

Si Erwin Bisain, taga-Naic at pang-siyam sa buong bansa na nakatapos sa Byaheng Bonifacio, habang kinakapanayam para sa programang SONA with Jessica Soho ng Channel 11.

Samantala, mai-uugnay ang muntik nang pagkasunog ng gusali ng Casa Hacienda de Naic noong ika-29 ng Agosto. Bandang 9:00AM, napansin ng mga magulang na nasa tapat ng gate ng eskwelahan na dumidiklap at pumuputok ang mga linya ng kuryenteng nakakabit sa unahan ng matandang gusali. Nagdulot ng panic at pangamba ang pangyayari sa maraming naroroon. Patuloy na isinusulong ng ilang mamamayan at samahan ang pangangalaga sa Casa Hacienda de Naic bilang pamana ng kasaysayan.

Naic holds flag raising ceremony under new mayor

Agosto 5, 2013 (Lunes). Sa kauna-unahang buwanang flag raising ceremony ng Naic sa ilalim ng bagong administrasyon, inilahad ni Mayor Junio Dualan ang mga kinaharap at naisagawa ng kanyang pamamahala sa nakalipas na isang buwan. Inilahad din niya ang tunguhin ng Naic sa mga susunod na panahon.
Ang mga nakiisa sa pagtataas ng watawat para sa unang Lunes ng Agosto habang inaawit ang pambansang awit.

Ang mga nakiisa sa pagtataas ng watawat para sa unang Lunes ng Agosto habang inaawit ang pambansang awit.

Unang tinalakay ni Mayor Dualan ang ukol sa kalinisan ng bayan. Araw-araw na umanong naghahakot ang mga basurero ng basura. Nakahiram pa umano ang Naic ng dagdag na dalawang trak-panghakot mula sa kapitolyo. May bulldozer rin umanong limang araw nang gumagana sa basurahan na kung magiging maganda ang gamit ay maaaring bilhin na ng Naic. May darating din umanong shredder ng plastik ngayong linggo, kung saan ang magigiling na basura ay bibilhin na mismo ng magpapahiram ng shredder. Isa umano ang Naic sa mga bayan sa Cavite na may sariling basurahan. Ang kailangan na lamang ay alagaan ito ng bayan.
   …
Paksa rin ni Mayor Dualan ang palengke. Dalawang beses umano kada linggo kung bombahin ito ng tubig ng mga bumbero. Ito ay upang laging malinis ang pamilihan. Ayon pa kay mayor, hihingi siya ng pulong sa mga taga-palengke upang tuluyan nang mawala ang korupsyon doon. Imumungkahi umano sa pulong na tuwing ika-15 at katapusan ng buwan na lamang magbabayad ng arkabala ang may mga fixed stall. Gagamitin umano ang resibo ng munisipyo para sa naturang transaksyon.
   …
Tungkol naman sa multi-milyong pisong grand central terminal na pinasimulan ng nagdaang administrasyon, hindi pa umano ito naite-turnover sa kanila ayon kay Mayor Dualan. Kung umuusad umano ang proyekto, sa feasibility study ay inaasahan sanang kumikita na ito ngayon. Sa kabila ng pagkaantala sa terminal, nakipagpulong na umano si mayor sa transport group, sa mga namamahala ng mga bus, baby bus at mga jeep. Nagkasundo umano sa pulong na magbabayad na ang mga sasakyan, katumbas ng babayaran nila sakaling operational na ang terminal. Itinuturing ni Mayor Dualan na malaking tulong ang koleksyon para sa bayan.
   …
Ang grupong Anakalayag ng Cavite State University  - Naic na naghahandog ng isang awit-panalangin.

Ang grupong Anakalayag ng Cavite State University – Naic na naghahandog ng isang awit-panalangin.

Binanggit din ni mayor na flashing na lamang ang traffic light sa mga panulukan sa Sabang at San Roque. Hudyat na lamang umano ang mga ilaw na ang bahaging iyon ay kanto o interseksyon. Idinagdag pa ni Mayor Dualan na may bago na ring ambulansya ang Naic.
   …
Samantala, bahagi umano ng plano ng pamahalaang Naic na pasimulan ang mga pagawain sa Setyembre. Nakalinya na umano ang pagpapaayos ng daan patungong palengke. Magkakaroon din ng pagawain sa mga eskwelahan sa Villa Apolonia at Bucana. Bukod sa mga nabanggit ay sunud-sunod na umano ang mga magiging pagawaing bayan.
   …
Nanawagan din si Mayor Dualan na pangunahan ng Barangay Association ang flag ceremony sa susunod na buwan. Pagkakataon umano ito upang magkasama-sama at makilala ng buong bayan ang mga nanunungkulan sa mga baranggay bago sumapit ang halalan sa Oktubre.
   …
Sa nakalipas umanong isang buwan, sumakit ang ulo ni mayor sa dami ng nagpasa ng aplikasyon sa trabaho. Umabot umano sa 3,000 ang mga nag-apply. Hindi umano madaling kausapin ang bawat isa upang sabihing tatanggapin o hindi ito matatanggap. Bilang tugon, isang job fair ang ilulunsad ng pamahalaang lokal ngayong Agosto. Inaasahan ang pagdating ng mga lokal at internasyonal na kumpanya.
   …
Bukas umano ang Munisipyo sa anumang suhestiyon upang mapaunlad pa ang bayan. Ayon kay Mayor Dualan, “Ako po ay humihiling, kaunting pag-unawa, kooperasyon. Ako po ay inyong tulungan. Tulungan n’yo ang pamahalaang bayan ng Naic sa amin pong pamamahala.”
   …
Ang mga department heads sa iba't ibang tanggapan ng Naic habang inaawit ang Himno ng Cavite.

Ang mga department heads sa iba’t ibang tanggapan ng Naic habang inaawit ang Himno ng Cavite.

Sa digital recorder ng Naic Cavite Online ay mahigit 18ng minuto ang itinagal ng mensahe ni Mayor Dualan. Sa buong palatuntunan ay nagbigay ng pambungad na pananalita si Vice Mayor Rod Castillo at pangwakas naman ang sa nangunang konsehal noong halalan, Konsehal SJ Nazareno. Isa-isa ring tinawag ang mga konsehal upang ipakilala ang mga komiteng kanilang hinahawakan sa Sanggunian Bayan.
   …

Speculations on airport relocation plan list Naic as option

Nobyembre 10, 2012 (Linggo). Kamakailan ay naging matunog ang bayan ng Naic bilang isa sa mga posible umanong pagtayuan ng magiging bagong pandaigdigang paliparan.

Ayon sa Rappler.com, nitong Agosto 30 ay inihayag umano ng pangulo ng Philippine Airlines (PAL) na si Ramon Ang, ang pagtatayo nito ng isang bagong airport. Ang paliparan ay nakatakda umanong isagawa sa loob ng tatlong taon, bagaman hindi pa tinutukoy ang mismong pagtatayuan (Philippines2050.com).

Nagmistulang palaisipan naman sa ilang netizen ang lokasyon ng magiging bagong paliparan. Sa ilang thread sa Skyscrapercity.com, naging masigla ang mga talakayan at palitan ng kuru-kuro hinggil sa lugar na pagtatayuan ng bagong airport.

Habang sinasabing nabili na ng San Miguel Corporation ang PAL noong Abril, lumutang ang Cavite bilang isa sa mga lalawigang maaari umanong pagtayuan ng airport. Sa Skyscrapercity.com, ayon kay jpdm, “Im telling you, with all those mega investments of San Miguel in Cavite which includes, 5 manufacturing plants (bottling plant-Yamamura, aluminium can plant-Yamamura Fuso Mold, dairy plant- Magnolia, meat processing (Monterrey and Purefoods), Steniel (packaging) and real estate ventures—I mean, there are rumors flying that Ramon Sy and San Miguel might go with a Cavite airport.”

Naging usapin din sa mga thread ang anyo ng lupa sa Cavite na mahalaga umano para sa isang airport. Ayon kay anonymous_filipino, “For Cavite, the only way to build an airport that is as ambitious as SMC-PAL’s proposed airport is to reclaim land near the area of Kawit and Cavite City. There are no available flat lands in the interior of Cavite (Trece Martires City area) since the interior of Cavite is already very built up. The only available flat land I can think of is at the area of Naic and Ternate.” Kapuna-puna naman sa talakayan ang mas pag panig ng mga netizen sa Naic kumpara sa Ternate. Ayon kay Mercato, “Naic… is closer and has more flat terrain.”

Kapansin-pansin din sa Skyscrapercity.com ang paghalaw ni theabe sa isang dokumentong mula sa Philippine Stock Exhange, Inc. (PSE). Sa ulat ni Mauro B. Badiola, Vice President Finance & Corporate Information Office ng PSE, may petsang Agosto 15, 2012, inihayag na “Ternate-Nasugbu tunnel development and the permanent PEZA law prescription of the Ternate Municipality (where Puerto Azul is 60% of the landmass) have led to actual interest in properties at the back door of Puerto Azul. Our field research—from our own staff’s families selling & from the talk of realty agents—in the adjacent close-knit towns of Naic, Maragondon, & Indang and Ternate itself has confirmed 100% the consolidation by purchase, of parcels of land aggregating to 4,000 hectares to date by the buying office of one of the country’s premier conglomerates. The conglomerate’s objective is to establish a 10,000 hectare corridor from the coastline of Ternate towards the Indang hinterlands, in order to create a duty free seaport, residential & industrial district, & airport in ipso facto benefits as Subic or Clark. We think this is in line with many urban planners calls—such as from our architects, Palafox Associates—that MetroManila (MM), like many large megacities, requires three airports & that the businessmen—like in the 50s told to move North to QC but developed Southwards—will again not listen to government but develop further South & Southwest of MM.”

Samantala, kasabay ng espekulasyon hinggil sa pagtatayo ng paliparan sa Naic ay ang mga puna at pagsusuri sa kung bakit imposibleng maging lokasyon ang naturang bayan. Ayon pa kay anonymous_filipino, “Pinipilit na sa San Miguel ang 10,000 hectare na lupa na yun sa Cavite. Magkaibang business entity ang Boulevard Holdings at San Miguel, at ang former ang magdedevelop ng 10,000 hectare property na yun sa Cavite, without the participation of San Miguel.”

Ayon pa kay NTprime, “we still now have the problem of distance and road infrastructure to tackle. As I mentioned, there are no major road projects in the pipeline for the next 1-2 years there. But the biggest thing going against Cavite is time to complete the projects, not just the airport but especially the road infrastructure. San Miguel didn’t mention anything about building toll roads there, the existing highway is only 2 lanes (with shoulders though), and there are choke points along the EPZA/Bacao Road, Antero Soriano Highway, and the Centennial Road.”

Dagdag ni mwg12a, “I do not think Naic would be it either. Ang statement is that there would be an elevated highway that will be connected to EDSA.”

Maliban sa Cavite, pinakamatunog ang lalawigan ng Bulacan bilang maaari umanong pagtayuan ng paliparan. Sa katunayan, nangunguna ang Bulacan, Bulacan sa poll sa Skyscrapercity.com para sa tanong na, “Where would you like to build and develop Manila’s new airport?” Sa oras na ito, 49.02% ang panig sa naturang bayan sa Bulacan, sinundan ito ng mismong NAIA na kinakailangan lamang umanong isaayos pa (15.69%), at pare-parehong may 7.84% ang San Jose del Monte City sa Bulacan, Naic, Ternate at mismong Clark Airport na kailangan lamang umanong isaayos pa.

Maging sa mga balitaan, sinasabing maaaring sa Bulacan itayo ang paliparan. Ayon sa ulat ng ManilaStandardToday.com, “The new airport… could be located in the southern towns of Bulacan province, or in the proximity of northern Metro Manila.” Ayon naman sa InterAksyon.com, “Philippine Airlines’ planned international airport would likely be located in Bulacan, according to a CIMB report.”

Samantala, inaasahang ganap na tutukuyin ang mismong pagtatayuan ng paliparan sa Enero o Pebrero ng 2013.