Local government on Saluysoy Bridge construction: “Magtulong tulong po tayong lahat para gisingin ang mga kinauukulan”

Abril 24, 2018 (Martes). Muling nagpalabas ng mensahe ang lokal na pamahalaang Naic hinggil sa estado ng isinasagawang Tulay ng Saluysoy.

tulay

Sa apat na pahinang patalastas na ipinaskil noong Abril 22 sa Facebook ng Munisipyo, muling inilahad ni Mayor Junio Dualan ang detalye sa pagpapagawa ng tulay, maging ang kanyang damdamin sa kabi-kabilang pagbatikos ng mga mamamayan ukol sa proyekto.

Gaya sa bahagi ng kaniyang talumpati nang magtaas ng watawat sa liwasan noong Marso 6, inilahad ng alkalde ang kanyang kanaranasan minsang maaksidente sa tulay noong kahoy pa ito, na isa sa mga dahilan upang hangarin niyang maipaayos lalo ang tulay (Read Related Story: Local government on Saluysoy Bridge construction: “Paumanhin kung medyo nakakaabala ito sa ating mga mamamayan”). Ang halos 50 milyong pisong pondo sa tulay ay “ibinaba” sa pamamagitan ni Senador Cynthia Villar na bunga ng pagsasabi ni Mayor Dualan nang minsang dumalaw ang una sa Naic.

Batay sa huling mensahe ng alkalde, “para sa kaalaman ng lahat ang tulay pong ito na gagawin ay may lapad na siyam (9) na metro. Pitong (7) metro ang salubungan at tig-iisang (1) metro magkabilang tabi na siyang daanan ng tao. Hindi po pwedeng lagyan ng hanging bridge dahil wala pong mapupwestuhan dahil sa lapad ng tulay na gagawin.”

Ayon pa sa mensahe, “kapag po ang pondo ay galing sa NATIONAL GOVERNMENT (National Project) ang pondo po ay doon bumabagsak sa district office natin, sa DPWH Tagaytay (DEPARTMENT OF PUBLIC WORKS and HIGHWAYS). Sila din po ang nangangasiwa sa pagpapagawa nito. Hindi po sa munisipyo bumabagsak ang pondo kaya ang pondo po ng tulay ay nasa DPWH TAGAYTAY. Ang nakakontrata po nito o gumagawa ay ang HAUSLAND CONSTRUCTION.”

Hindi rin umano tumitigil si Mayor sa pag-follow up sa kontraktor. Ipinararating din umano lagi niya sa DPWH ang sitwasyon ng tulay. Aniya, “at pag wala pa ring aksyon ay ipararating ko na ito kay Senadora Cynthia Villar at sa kanyang anak na si DPWH Secretary Mark Villar. Kung nasa atin po ang pondo nito sinisigurado ko sa inyo magagawa natin agad ito.”

https://www.facebook.com/plugins/post.php?href=https%3A%2F%2Fwww.facebook.com%2Fmunicipalityofnaic%2Fposts%2F744158965791890&width=500

Naghayag din ng saloobin si Mayor Dualan kaugnay ng mga batikos sa kanya dahil sa pagawain. Ayon sa kanya, “nalulungkot ako dahil kabi-kabila ang bumabatikos sa akin sa Facebook, mga pangit na salita na hindi naman nila alam ang tunay na sitwasyon. Minsan hindi ako makatulog, at minsan naman nasisisi ko ang sarili ko kung bakit naipanghingi ko pa ng pondo ang tulay wala sana akong problema at hindi naman ako ang palagiang nasa puwesto.”

Mula nang isara ang tulay, bumuhos sa mga post at kumento ng mga taga-Naic sa Facebook ang sari-saring puna at batikos. Agad na idinaing ang kawalan ng daang-tao sa tulay at ang maiksing abiso sa bayan. Iniinda rin ng marami ang pagtataas ng pamasahe at paghaba ng byahe dahil sa mga pagrereruta (Read Related Story: Tulay ng Saluysoy totally closed for construction). Umigting pa ang mga batikos nang bayan sa Munisipyo nang lumutang ang halaga ng tulay at naging kapuna-puna ang “mabagal” umanong pag-usad ng pagawain.

Kaugnay ng mga ito, sinabi ni Mayor Dualan na “mas nangingibabaw pa rin sa akin ang kapakanan ng nakararami dahil sayang ang pagkakataong ibinigay sa atin kaya sana naman hinay hinay lang ang panghuhusga ninyo sa akin. Sino ba namang nanunungkulan ang ayaw agad magawa ang isang proyekto na ang makikinabang ay hanggang kaapo-apuhan na natin? Mawala man tayo sa mundo ay nakatayo pa rin ang tulay na ito.”

Samantala, sa ilang pagkakataong pinagbawalan ng mga manggagawa sa tulay na kumuha ng litrato ang mga taga-Naic sa konstruksyon, mismong ang Munisipyo ang nagpost sa Facebook kahapon ng larawang kuha sa pagawain. Matutungahayn din sa mga larawan ang detalye ng proyekto na una nang hinahanap ng mga mamamayan. Ayon sa detalyeng tinatawag na “Construction/ Repair/ Improvement of Various Infrastructure Including Local Projects – Local Bridges – Construction of New Saluysoy Bridge, Sapa, Naic, Cavite” na may Project ID #18DG0056, nagkakahalaga ito ng 46,831,752 piso; at sinimulan noong Pebrero 6, 2018 at matatapos sa Marso 20, 2019.

https://www.facebook.com/plugins/post.php?href=https%3A%2F%2Fwww.facebook.com%2Fmunicipalityofnaic%2Fposts%2F744404199100700&width=500

Ang Tulay ng Saluysoy na nagdurugtong sa Sapa at Kanluran ay ang pangunahing nag-uugnay sa kabayanan at mga baryong kostal ng Naic. Sa tulay kalimitang dumaraan ang mga nagpaparoo’t parito sa Labac, Mabulo, Bancaan, Bagong Kalsada, Bucana Malaki , Sapa, at maging sa mga kakawing na baryo ng Ternate.

Paalala pa ng alkalde “sa mga nagpopost sa Facebook or Social Media, maging maingat po sana tayo bago magkomento lalong lalo na kung hindi natin alam o hindi tayo sigurado kung ano ang totoo. ‘THINK BEFORE YOU CLICK.’”

Panawagan ni Mayor Dualan, “muli po ang pakiusap ko magtulong tulong po tayong lahat para gisingin ang mga kinauukulan.” Ibinigay niya ang detalye ng mga kinuukulan: si Engr. Ariel Ferrer ng Hausland Construction (0905-751-2732); si De Arthur D. Pascual Jr., ang District 7 DPWH District Engineer sa DPWH Cavite Sub-District Engineering Office (046-860-3127/ pascual.arthurjr@dpwh.gov.ph); maging ang Contact Service ng Bayan o ang 8888 Presidential Complaint Center (8888/ http://www.contactcenterngbayan.gov.ph).

Sa huli, sinabi ni mayor na “nais ko rin pong ipabatid na anuman ang inyong tanong o hinaing sa ating lokal na pamahalaan ay maaari ninyong ipaabot sa akin ng personal o kaya ay sa aking opisina upang mapag-usapan o di kaya’y maipaliwanag ng maayos sa inyo ang problema.”

Advertisements

Local government on Saluysoy Bridge construction: “Paumanhin kung medyo nakakaabala ito sa ating mga mamamayan”

Marso 6, 2018 (Martes). Inihingi ng paumanhin ni Mayor Junio Dualan ang pagkakasara ng Tulay ng Saluysoy na nagdurugtong sa Sapa at Kanluran.

28740757_1696662720428621_1532235878_n

Ang isinarang Tulay ng Saluysoy. Kuha noong Marso 3, 2018, sampung araw mula nang isara ito sa publiko.

Sa mensahe ng alkalde sa buwanang pagtataas ng watawat sa liwasan kahapon ay humingi siya ng dispensa sa bayan. Ayon kay Mayor Dualan, “inihihingi ko ng paumanhin kung medyo nakakaabala ito sa ating mga mamamayan.” Sa kabila umano ng abalang dulot ng konstruksyon sa kasalukuyan, “ang makikinabang dito ay kanunununuan natin, kahit wala na tayo, habang buhay nariyan ang tulay natin,” ayon sa mayor.

Ang lumang tulay ay papalitan na umano ng siyam na metrong lapad at salubungang daang konkreto. Nagkakahalaga umano ito ng 50 milyong piso, bilang proyektong inilapit ng pamahalaang Naic sa tanggapan ni Senador Cynthia Villar.

Dama umano ng alkalde ang dinaranas ng mga taga-Naic na apektado ng tulay gayong siya man ay taga-Bancaan na lagian ding tumatawid sa Saluysoy. Gayunman, “matagal na itong hinahangad ng ating mga kababayan, lalong lalo na sa mga taga-baybay dagat.” Ang Saluysoy, bilang pangunahing nag-uugnay sa mga baryong kostal at kabayanang Naic ay siyang pangunahing tawiran ng mga nagpaparoo’t parito sa Labac, Mabulo, Bancaan, Bagong Kalsada, Bucana Malaki, Sapa, maging ng mga kakawing na baryo ng Ternate.

Inilahad pa ni Mayor Dualan ang kanyang matagal nang karanasan kung bakit hindi umano niya malilimutan ang Tulay ng Saluysoy. Minsan umano siyang naaksidente noon sa tulay kung kaya may tahi siya sa noo. Mula sa naturang aksidente, pinangarap na niyang maisaayos at maging bato ang tulay—mas matibay, malayo sa dating kahoy o metal na laging nasisira at delikado.

Bilang mga alternatibo, nagpasa umano ng resolusyon ang Sanggunian Bayan sa tunay na halaga ng pamasahe sa mga traysikel na nagbagong ruta. Binuksan din umano ang mga direktang byahe ng bangka mula Balsahan patungong Sapa at Bucana Malaki. Patuloy din umano ang pagpapalapad ng mga kasalukuyang dinaraanan sa mga bukid ng Gugo-Mabulo at Bulihan-Sapa.

Unang nagpaabot ng dispensa ang pamahalaang lokal sa pamamagitan Facebook Fanpage nito noong Pebrero 27. Ayon sa abiso, “Ang Saluysoy Bridge ay kasalukuyang isinasaayos ng Department of Public Works and Highways at Lokal na Pamahalaan ng Naic. Humihingi po kami ng paumanhin sa lahat, sa mga maidudulot nitong pansamantalang abala, humihingi din po kami ng paumanhin sa biglaang pagtaas ng singil ng pamasahe sa tricycle, pagkatapos naman po ng lahat na ito, ay isang pangmatagalang ginahawa para sa ating lahat. Maraming salamat sa inyong kooperasyon!”

Ayon kay Mayor Dualan, “gagawin sa loob siguro ng isang taon” ang Tulay ng Saluysoy. Matatandaang isinara sa publiko ang tulay noong Pebrero 22 (Read Story: Tulay ng Saluysoy totally closed for construction).

Tulay ng Saluysoy totally closed for construction

Pebrero 23, 2018 (Biyernes). Isinara na sa publiko ang Tulay ng Salusoy kahapon upang bigyang daan ang konstruksyong babago sa tulay.

28342556_1992889510751683_1962059308_o

Ang iba’t ibang anyo ng Tulay ng Saluysoy sa nakalipas na mga dekada.

Ipinaskil ang mga babala at nagtrend sa Facebook account ng mga taga-Naic ang tungkol sa pagsasara ng tulay noong Pebrero 15. Sa kabilaang dulo ng tulay ay mababasa ang babala, at mayroon din nito sa may liwasan. Ayon sa patalastas, “Effective February 22, 2018 Saluysoy Bridge will be totally close to traffic due to construction of new Saluysoy Bridge.”

Mabilis ang reaksyon ng mga taga-Naic hinggil sa naturang pagsasara. May ilang nagsasabing mahaba-haba sana ang abiso; o kaya ay huwag agad-agad ang pagsasara; habang may ilang sang-ayon gayong para rin umano ang konstruksyon sa inaasahang kaalwanan sakaling matapos ang tulay.

Naging mas maingay ang saloobin ng mga taga-Naic nang lubusan nang isarado ang tulay. Sa naturang pagsasara, maging ang mga naglalakad ay hindi na hinayaang makatawid taliwas sa mga nangyayari tuwing may pagkukumpuni o konstruksyon sa tulay. Kaugnay nito, agad na naramdaman ng mga madalas tumawid sa tulay, gaya ng mga mag-aaral at nagtatrabaho, ang epekto ng pagsasara.

Ang tulay ay ang pangunahing nagdurugtong sa kabayanan at mga baryong kostal ng Naic. Sa tulay kalimitang dumaraan ang mga nagpaparoo’t parito sa Labac, Mabulo, Bancaan, Bagong Kalsada, Bucana Malaki at Sapa.

Nagkaroon ng mga pagrereruta para sa mga papasok at lalabas sa mga nabanggit na baryong kostal. Ang mga manggagaling sa kabayanan o poblasyon ay daraan sa Soriano Highway, at papasok sa sementadong daan sa bukid palabas ng Mabulo. Ang mga palabas naman ng mga baryo, dadaan naman sa isa pang sementadong daang-bukid sa Sapa at lalabas muli sa highway.

Kasabay ng mga paghaba ng mga ruta ay ang pagtataas ng mga pamasahe sa traysikel. Sa isang paunawang inilabas ng Bancaan-Sapa Tricycle Operator and Driver Association, umakyat sa 20 pesos ang pamasahe para sa Bancaan pa-Naic at Sapa pa-Naic. Kasama sa tinutukoy sa Naic ang mga pa-Grand Central Terminal at Petron Gasoline Station sa Ibayo Silangan. Mas malaki naman ng limang piso ang mga mula Naic papasok sa Bancaan at Sapa sa presyong 25 pesos. Halos ganito rin ang bagong pamasaheng sinusunod ng mga pa-Labac, Bagong Kalsada, Bucana Malaki at Mabulo. Hindi lalayo sa 10 hanggang 15 ang pamasahe sa mga rutang ito noong hindi pa nagsasara ang tulay.

Sa kabila ng naturang paunawa, mula kahapon hanggang ngayong araw ay halos parehong 25 pesos na ang singil ng maraming tricycle driver palabas at papasok ng mga baryong kostal. Kaugnay nito, dumadaing ang mga mananakay sa halos 30 pesos na itinaas ng pamasahe mula sa dati ay 20 pesos na balikan. Dumadaing din ang ilang nagtatrabaho ng madaling araw dahil sa kadiliman ng ilang bahagi ng mga daan sa bukid. Mayroon ding pagpapalapad ng daang isinasagawa sa bungad ng daang-bukid sa highway na papasok sa Mabulo. Nagkalat din umano ang mga asong maaaring makakagat sa mga naglalakad, nagbibisikleta o dumadaan sa mga daang-bukid.

001

Byahe ng bangkang de-sagwan sa Balsahan-Latoria.

Upang makatipid, ilang mag-aaral at mga taga-baryo ang pinipiling sumakay sa bangka sa halip na sa traysikel. May mga byahe ang bangkang de-sagwan sa Bucana Malaki at Bucana Sasahan. May ruta rin ng bangkang de-sagwan sa Latoria pa-Balsahan. Parehong nasa dalawang piso ang pamasahe sa mga naturang byahe ng bangka. Ang ilang pa-poblasyon na nagmumula sa Bucana Malaki, pagdarating sa Bucana Sasahan ay sumasakay sa traysikel at nagbabayad ng pamasaheng 10 piso. May ilang naglalakad naman mula Bucana Sasahan pa-Latoria at muling sumasakay sa bangka upang marating ang Balsahan at naglalakad na lamang pa-kabayanan. Ayon sa ilang bangkero, kung sila ang tatanungin, imposible sa ngayon at hindi ganoong kadali managwan mula Balsahan pa-bukana gayong mahangin at minsan ay maalon. Ang mahabang ruta ng pagbabangkang ganoon para sa publiko ay maaari rin umanong mangailangan pa ng koordinasyon sa Coast Guard.

Samantala, puno naman ng katanungan ang maraming mga taga-Naic ukol sa isinarang tulay. Mababasa sa Facebook posts at maririnig sa mga usapan ang paghahanap sa nakapaskil na detalye ng pagawain. Sa panayam ng Naic Cavite Online (NCO) sa ilang construction worker kanina sa tulay, gagawin na umanong bato ang dating bakal na tulay. Palalaparin umano ito nang hanggang siyam na metro upang magkasya na ang salubungan ng mga daraang sasakyan. Natunghayan ng NCO ngayong araw ang paghawan sa mga puno at halaman sa mabanging bahagi ng mga dulo ng tulay. Ayon pa sa mga construction worker, lalagyan na rin umano ng riprap ang mga gilid na iyon ng bangin. Nitong hapon ay binabaklas na ang ilang bakal sa magkabilang harang sa gilid ng tulay. Wala ring malinaw na anunsyo sa ngayon kung gaano katagal isasara ang tulay.

28417509_1992889400751694_1659178552_o

Matutunghayang hinawan na ang masukal na bahagi ng bangin para sa pagbabago ng tulay. Kuha ang larawang ito ngayong araw.

Sa nakalipas na mga taon, natunghayan at naitala rin ng NCO ang mga pagbabagong pinagdaanan ng Tulay ng Saluysoy. Noong Oktubre 6, 2017, saglit na isinara ang tulay upang i-aspalto ang ilang metrong bahagi ng kalsada ng Sapa na karugtong ng tulay. Pebrero 15, 2016 naman nang tatlong linggong isara sa mga sasakyan ang tulay upang palitan ang metal nitong sahig. Bagaman pwedeng daanan ng tao, idinaing din noon ang pagtataas ng pamasahe dahil sa nagdodobleng sakay-baba sa kabilaang dulo ng tulay. Disyembre 17 hanggang 20, 2014 ay isinasara naman tuwing 11:00PM hanggang 5:00AM ang tulay para sa pagkukumpuni. Naging alternatibong daan noon ang Malainen Bago-Sapa NIA Road. Isinagawa namang bakal ang dating kahoy na tulay noong 2011. Sa nakalipas na maraming dekada, sinasabing makailang ulit na ring nasira at naipaayos ang tulay. Minsan pang nagkaroon ng hanging bridge upang maitulay ang Kanluran at Sapa nang bumagsak ang Tulay ng Saluysoy sa bigat ng isang dumadaang trak noong 1982. Minsan pang ininda ng tulay ang bigat ng mga sasakyan nang maging alternatibong ruta naman ito noong ang Tulay ng Kumbento naman ang ipagawa sa San Roque at Malainen, Agosto 2012.

Ang “saluysoy” ay pinaniniwalaang hango sa paglalarawan sa kilos ng tubig. May pagsaluysoy o tila pagbukal at pag-agos di umano noon ng tubig sa isang bahagi iyon ng Naic.

 

Naicqueños this New Year, thankful, hopeful

Enero 1, 2018 (Lunes). Maituturing na ang pagsalubong sa Bagong Taon ang isa sa mga malawakang ipinagdiriwang ng mga taga-Naic.

Tila finale ng buong Disyembre ang salubong ng Naic sa Bagong Taon na nagsisimula sa fiesta ng Inmaculada Concepcion, at sinusundan ng mahabang Kapaskuhan. Masigla ang galaw ng mga tao sa Naic at kabi-kabila ang pagdiriwang.

26167032_1383314128446500_3616893049479400264_n

Tagpo sa palengke ng Naic, gabi ng Disyembre 31, 2017.

Sa pagwawakas ng 2017, gaya sa mga nakalipas na taon, pinakapinaghandaan ng marami ang media noche. Habang may ibang ilang araw nang nakapamili, marami pa rin ang nagsimula pa lamang mamili ng mga panluto at panghain kahapon, bisperas ng Bagong Taon. Sa katunayan, masikip pa rin ang mga pasilyo sa palengke dahil sa dami ng mamimili kahit kagat na ang dilim. Hindi karaniwang marami pa ang namamalengke kung hapon na o gabi. Mabenta ang mga pangrekado sa mga lutuin. Pila-pila rin ang mga mamimili sa mga grocery at convenience store sa iba’t ibang panig ng Naic. Karaniwang binibili ang mga alak, softdrinks, cake, tinapay, litsong manok, at iba pang maihahain at mapagsasaluhan.

 

Bilang karaniwang paniniwalang naghahatid ng kasaganahan ang mga paghahain ng prutas, nanatiling mabili ang samu’t saring prutas. Ilan sa mga matutunghayan sa mga tindahan at hapag ang suha, pakwan, mansanas, ubas, dalanghita, orange, longgan, kyat-kyat, tsiko, papaya, pinya, buko, saging, milon, peras, kastanyas, at mangga. Sa katunayan, maraming nagsulputang tindahan ng prutas, kahit sa mga tapat ng bahay-bahay, sa iba’t ibang barangay. May ilang maagang nag-alok ng mga prutas na nagsilbing sideline nila.

26167069_1383449545099625_1952606077903479734_n

Paglilitson sa Ibayo, bahagi ng panghain sa media noche.

Natunghayan din ang ilang taga-ibayo na naglitson ng mga ulo ng baboy na inihain sa kani-kanilang hapag para sa media noche. Hindi maikakailang isa ang litson sa mga inihain ng marami, lalo at sa pagtataya, hindi bababa sa 300 buong baboy ang nilitson sa Naic kahapon.

 

Ilan pa sa mga inihain ay ang mga karne ng baboy at manok gaya ng ihaw, prito, at iba pang putahe. May ilan ding lamang dagat gaya ng alimango at hipon. May pansit, sopas, spageti, pizza, at mga matatamis gaya ng salad, ube, brownies, maja, tsokolate, at leche flan.

Bukod sa prutas at ibang pagkain, puno rin ang hapag ng mga taga-Naic ng iba’t ibang hain na salamin ng mga pinaniniwalaang maghahatid ng swerte. Kasaganahan umano ang hatid kung bakit may mga hapag na may haing bigas, tubig, asin, bulak, itlog, at pera.

26235336_1630869710341256_886438303_n

Pagsasaboy ng asin ng isang guro sa kanyang silid-aralan.

Bukod sa mga nabanggit, buhay rin ang iba pang paniniwala sa mga gawaing magtataboy sa mga malas at maghahatid ng swerte kung bagong taon. Isang guro sa pampublikong sekundarya ang tiniyak na maliwanag sa kaniyang silid-aralan sa pagpapalit ng taon. Nagsaboy rin siya ng asin sa naturang kwarto. May ilan ding nagluop sa mga bahay sa pamamagitan ng insenso at kamanyang habang nagbabago ang taon. Bukod pa rito ang mga pamahiing tatangkad ang mga tatalon sa bagong taon, at mananagana ang may mga pera sa bulsa. May ilang nagsuot ng pula at bilog-bilog na mga simbolo umano ng swerte at pera.

 

 

26234903_1630869773674583_260349266_n

Pagluluop sa pagpapalit ng taon.

Labis na kapuna-puna ang pagkaunti ng mga paputok sa Naic. Ayon sa mga balitaan, ganito ang trend ng pagsalubong sa Bagong Taon sa buong bansa. Kung dati ay kabi-kabila ng nagtitinda ng paputok, sadyain na ngayon ang iilang tindahan upang makabili ng mga lusis, fountain, at ilan pang paputok. Sa mismong pagbabago ng taon, madalang saan man sa Naic ang dati-rati ay kabi-kabilang pagputok at malalakas na pagsabog. Patuloy pa rin namang natunghayan ang pagliwanag ng mga himpapawid sa Naic dahil sa mga fireworks.

 

26169348_1383314088446504_4509087321225551736_n (1)

Mabenta ang mga torotot bilang pampaingay.

Sa kabila ng halos paglalaho ng mga paputok, hindi napigil ang Naic sa pag-iingay sa pagpapalit ng taon. Mabenta ang torotot na siyang ginamit ng marami. Kinalampag ng iba ang kanilang mga kaldero, habang kinalansing naman ng ilan ang kanilang mga alkansya. Maingay rin ang kabi-kabilang mga telebisyon at patugtog na isinagad ang lakas ang tunog. Hindi rin naawat ang napakaraming motorista sa pagpapaingay ng kanilang mga sasakyan. Isang grupo ng napakaraming nakamotorsiklo ang nag-ikot sa Naic na pinaingay ang mga tambutso at maya’t maya ang busina.

Puno rin ng kasiyahan ang maraming lugar sa Naic habang sinasalubong ang Bagong Taon. Sa Kalye Luna sa Baranggay Kanluran, nagpatuloy ang ilang taon nang tradisyon ng mga tagaroon. Mula sa kontribusyon ng magkakapitbahay, nagkaroon ng street party sa lugar kagabi. Sari-sari ang mga palaro gaya ng pinoy henyo at pukpok-palayok. Pinasisigla ang pagdiriwang ng maya’t mayang paagaw ng barya at mga kendi. Sumasalit naman sa palatuntunan ang mga pa-raffle at sayawan, na may ilang tugtog pang ginagamit kung may mga karakol. May mga kagayang kasiyahan sa ilang bahagi ng Balsahan, Gomez, at iba pang barangay.

26167541_1383550698422843_4373055692673715286_n

Matutunghayan ang mga taga-Kalye Luna habang nagkakasiyahan sa pagsalubong sa 2018.

Dahil sa mahaba ang bakasyon, reunion rin para sa maraming pamilya ang Bagong Taon. Sa pagliwanag ng unang araw ng 2018, nagtipon para sa muling pagsasalo ang ilang angkan.

Hindi nawala ang kinagawiang New Year’s Resolution ng mga taga-Naic. May kinalaman sa kalusugan at pagtatrabaho ang kalimitang nais nilang baguhin. May ilang nais mag-diet at ehersisyo, gaya ng nais na pagpapaliit ng tiyan ni Benedic Bilugan. Ayon naman kay Jenine Pamer Torres Villanueva, mas magsisipag siya sa trabaho upang makatulong siya sa pamilya, at mapag-aral ang kapatid.

Habang positibo sa 2018, marami ring ipinagpapasalamat ang mga taga-Naic sa nagdaang 2017. Malusog at buong pamilya ang pangunahing ipinagpapasalamat ng marami. Ayon naman kay Kimberly Ricafrente Credito, dininig ng Diyos ang kaniyang hiling na magdalang tao bago matapos ang 2017.

26167658_1383550665089513_2607719973213498861_n

Ang magkaka-baranggay sa kalye Luna at Pelaez ng Kanluran.

Hindi naman pinalampas ng mga taga-Naic na magpasalamat sa Diyos sa pamamagitan ng pagtungo sa mga bahay-sambahan. Sa Parokya ng Naic, nagkaroon pa ng New Year’s Eve Mass kahapon, ika-7 at ika-9 nang gabi. Sinunod naman ang iskedyul ng karaniwang mga misa kung Linggo ngayong Enero 1: 6:00AM, 8:00AM, 4:00PM, at 6:00PM. Kasabay ngayong araw ang kapistahan ni Maria bilang Ina ng Diyos. Kaugnay nito, sa kanyang misa nitong 4:00PM, hinikayat ni Fr. Isagani Aviñante, kura ng Parokya ng Naic, ang sambayanan na “harapin ang Bagong Taon na may pananampalataya, pag-asa, at kadakilaan ng loob sapagkat kasama natin si Maria.”

Buong araw maaliwalas ang panahon sa Naic kahapon at ngayon. Ang dalawang gabi ay nasa temperaturang 26-27°C.

Sa kabuuan, maituturing na mapayapa, masigla, makulay, at masaya ang Bagong Taon sa Naic ngayong 2018.

PBA’s Ranidel De Ocampo to students: ‘Wag magbibisyo

Setyembre 18, 2017 (Lunes). “‘Wag magbibisyo.” Isa ito sa mga payo ni Ranidel De Ocampo, manlalaro ng Meralco Bolts sa Philippine Basketball Association o PBA, nang maging panauhin sa Sports Festival ng Cavite State University (CvSU) Naic kaninang umaga.

21845408_1529839550444273_669875010_o

Ang pagbisita ni Ranidel De Ocampo, manlalaro ng Meralco Bolts – PBA, sa Cavite State University Naic.

Ipinayo rin ni De Ocampo na magtapos ang mga mag-aaral ng CvSU Naic, sapagkat ayon sa kanya, “totoo ang sabi ng mga magulang na mag-aral nang mabuti.” Kayamanan aniya ang edukasyon. Dagdag niya, tatlo sa kanyang mga pinsan ay nagtapos sa CvSU Naic at maayos umano ang kani-kanilang buhay sa kasalukuyan.

Para sa mga manlalaro, idinagdag ni De Ocampo na huwag silang mag-aaway-away at nagbigay rin siya ng “good luck” para sa iba’t ibang palakasan.

Ayon kay De Ocampo, malapit sa kanya ang Naic gayong sa Tanza siya lumaki. Aniya, sa simbahan ng Naic siya noon nagsisimba, at ang kaarawan niya ay ang kapistahan ng bayan ng Naic, Disyembre 8. Madalas din umano siyang dumadaan sa Naic kung mapapagawi sa Batangas; at may mga pagkakataong kumakain sa mga food chain ng bayan.

Mainit ang pagtanggap ng CvSU Naic, at halos lahat ng mag-aaral ay nagkaroon ng pagkakataong makapagpakuha ng larawan kay De Ocampo. Ngayong araw ang pagbubukas ng hanggang bukas na palakasan sa CvSU Naic nang mahigit 1,000 mag-aaral sa sekundarya at kolehiyo.