Naic celebrates town fiesta 2006

Sa tatlong taon ng patuloy na pagtatala ng NAIC ONLINE ukol sa pistang-Naic, kapansin-pansin ang matamlay na pagdiriwang ng kapistahan ngayong 2006. Sa mga nakararaang taon, masamang panahon at kahirapan ng buhay ang mga pangunahing dahilan upang tumamlay ang fiesta. Sa kasalukuyan, ang bumabangong bayan naman mula sa trahedya ang siyang dahilan.

***

Oktubre 10 nang magsimula ang baratilyo sa Ibayo Silangan. Tradisyon nang maituturing ang pagbubukas ng mga baratilyong ganito, na kakabit na rin ng peryaan, ay nagsisilbing mga hudyat sa nalalapit na kapistahan. Nobyembre naman, nagsimula nang magkabit ng mga banderitas ang mga baranggay sa kabayanan.

Ika-5 ng Disyembre, binuksan ang isa pang baratilyo sa mismong plaza ng bayan. Sari-sari ang paninda roon gaya ng mga dekorasyon sa bahay, mga damit, laruan, pagkain, at kung anu-ano pa. Naging lugar ito upang magkatipon ang mga tao, at nang maramdaman ang kilos ng bayan sa nalalapit na fiesta.

***

Bukod sa sinasabing kahirapan ng buhay, isa rin sa mga itinuturing na dahilan sa pagtamlay ng fiesta ang naganap na pananalasa ng bagyong Milenyo. Marami, kung hindi man lahat, sa mga direktang nasalanta ng bagyo ang kung hindi naghanda, ay kaunting-kaunti na lamang ang inihanda. Ganito ang sinasabi ng ilang taga-Balsahan, Humbac at Makina.

Kapuna-puna rin ang luwag sa pamilihang bayan na dati-rati ay siksikan sa mga panahon ng fiesta. Kung dating bisperas pa lamang ay naaamoy na ang mga nilulutong putahe, naririnig ang igik ng mga kinakatay na baboy, at pinasisigla na ang marami ng mga bandang naglilibot, sa taong ito, tila halos naglaho.

***

Isa sa mga handog ng pamahalaang lokal sa bayan ay ang “Bakbakan sa Naic.” Mahigit sampung baguhang boksingero ang naimbitahan upang maglaban-laban sa covered court ng Naic, ika-5nh, bisperas ng fiesta. Dinagsa ng masang Naicqueño ang nasabing palabas.
***
Madaling araw pa lamang ay sunud-sunod na ang misa sa simbahan ng bayan. Inilagak din ang mga imahe ng Birheng Imaculada sa unahan ng simbahan gayong ang altar mayor ay tinakluban ng malaking telang lila (kulay sa Panahon ng Advento), at tarpaulin na may larawan ng aasahang altar mayor matapos isagawa ang tinataklubang konstruksyon ng nasabing altar.

Maraming deboto ang lumalapit at humahawak sa dalawang imahe ng Birhen na kapwa nasa kaliwang (kung nakaharap sa altar) gilid ng simbahan sa buong araw ng kapistahan. Marami rin mula sa iba’t ibang lugar at bayan ang dumadayo ng simba sa dambana; at bukod sa ilang nagtitinda sa plaza, dagsa rin ang mga nagkakandila sa harap ng simbahan.

Iisa naman ang banda-musikong lumibot sa mga pangunahing kalsada ng bayan. Naglibot ito bandang ika-10 ng umaga na inulit sa pahapon. Ayon sa ulat, ito umano ang KKK Band, dati ring kilala bilang Western Colleges Band. May isa ring banda ng mga nag-anyong ati-atihan ang lumibot sa bayan, na namimigay ng sobre at nanghihingi ng donasyon.

Ang paglalagay ng baratilyo sa buong poblasyon ay naging daan upang buhayin nga ang kilos sa kabayanan. Sinasabing kung wala ang naturang pamilihan, tuluyang masasabing matamlay ang kabuuan ng fiesta, malayo sa mga tagpo ng mga kalsadang dati-rati ay pinagpaparoona’t parito ng mga namimiyesta. Hapon at pagabi nang tuluyang dumagsa ang mga tao.

Nagpatuloy sa paninikip ang daloy ng trapiko sa kabayanan na naglalagos sa mga pangunahing kalsada pa-Ibayo at pa-Calle Mayor. Marami ang nahirapang agad makapasok sa loob ng bayan. Tuluyang huminto ang daloy ng trapiko nang bigyang daan ang prusisyon para sa patrona ng bayan.

Inalis naman ang baratilyo sa mismong liwasan at naiwan ang mga nakapalibot sa plaza. Ito ay upang bigyang daan ang ilang palabas. Dinumog ng tao ang liwasan at nasaksihan ang pagpapalipad ng hot air balloons, at isang palatuntunang komedya, nagsimula halos maghahatinggabi na. Samantala, hanggang ika-10 pa ng Disyembre ang itatagal ng baratilyo sa poblasyon.

***

Habang naniniwala ang maraming “malungkot,” o “matamlay” ang fiesta, ang mismong diwa naman nito ay hindi naglaho–marami pa rin ang nagsimba para sa patrona, nagkatipon ang marami sa plaza, at umunti man ang handa sa maraming hapag-kainan, nagkasalu-salo pa rin ang magkakamag-anak at magkakababayan.

***

Gabi pa lamang ng ika-9 ng Disyembre, Sabado, nagsimula nang bumuhos ang ulan na may kasamang paghangin. Pagsapit ng kinabukasan, Linggo, buong araw namang hindi humihinto ang ulan. Inilagay ang Cavite sa signal number 1 dala ng bagyong Seniang (International name: Utor). Dala nito, ang ‘di sana ay prusisyon sa ika-7 ng gabi ay inilipat pa-Linggo.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s