Local government on Saluysoy Bridge construction: “Magtulong tulong po tayong lahat para gisingin ang mga kinauukulan”

Abril 24, 2018 (Martes). Muling nagpalabas ng mensahe ang lokal na pamahalaang Naic hinggil sa estado ng isinasagawang Tulay ng Saluysoy.

tulay

Sa apat na pahinang patalastas na ipinaskil noong Abril 22 sa Facebook ng Munisipyo, muling inilahad ni Mayor Junio Dualan ang detalye sa pagpapagawa ng tulay, maging ang kanyang damdamin sa kabi-kabilang pagbatikos ng mga mamamayan ukol sa proyekto.

Gaya sa bahagi ng kaniyang talumpati nang magtaas ng watawat sa liwasan noong Marso 6, inilahad ng alkalde ang kanyang kanaranasan minsang maaksidente sa tulay noong kahoy pa ito, na isa sa mga dahilan upang hangarin niyang maipaayos lalo ang tulay (Read Related Story: Local government on Saluysoy Bridge construction: “Paumanhin kung medyo nakakaabala ito sa ating mga mamamayan”). Ang halos 50 milyong pisong pondo sa tulay ay “ibinaba” sa pamamagitan ni Senador Cynthia Villar na bunga ng pagsasabi ni Mayor Dualan nang minsang dumalaw ang una sa Naic.

Batay sa huling mensahe ng alkalde, “para sa kaalaman ng lahat ang tulay pong ito na gagawin ay may lapad na siyam (9) na metro. Pitong (7) metro ang salubungan at tig-iisang (1) metro magkabilang tabi na siyang daanan ng tao. Hindi po pwedeng lagyan ng hanging bridge dahil wala pong mapupwestuhan dahil sa lapad ng tulay na gagawin.”

Ayon pa sa mensahe, “kapag po ang pondo ay galing sa NATIONAL GOVERNMENT (National Project) ang pondo po ay doon bumabagsak sa district office natin, sa DPWH Tagaytay (DEPARTMENT OF PUBLIC WORKS and HIGHWAYS). Sila din po ang nangangasiwa sa pagpapagawa nito. Hindi po sa munisipyo bumabagsak ang pondo kaya ang pondo po ng tulay ay nasa DPWH TAGAYTAY. Ang nakakontrata po nito o gumagawa ay ang HAUSLAND CONSTRUCTION.”

Hindi rin umano tumitigil si Mayor sa pag-follow up sa kontraktor. Ipinararating din umano lagi niya sa DPWH ang sitwasyon ng tulay. Aniya, “at pag wala pa ring aksyon ay ipararating ko na ito kay Senadora Cynthia Villar at sa kanyang anak na si DPWH Secretary Mark Villar. Kung nasa atin po ang pondo nito sinisigurado ko sa inyo magagawa natin agad ito.”

https://www.facebook.com/plugins/post.php?href=https%3A%2F%2Fwww.facebook.com%2Fmunicipalityofnaic%2Fposts%2F744158965791890&width=500

Naghayag din ng saloobin si Mayor Dualan kaugnay ng mga batikos sa kanya dahil sa pagawain. Ayon sa kanya, “nalulungkot ako dahil kabi-kabila ang bumabatikos sa akin sa Facebook, mga pangit na salita na hindi naman nila alam ang tunay na sitwasyon. Minsan hindi ako makatulog, at minsan naman nasisisi ko ang sarili ko kung bakit naipanghingi ko pa ng pondo ang tulay wala sana akong problema at hindi naman ako ang palagiang nasa puwesto.”

Mula nang isara ang tulay, bumuhos sa mga post at kumento ng mga taga-Naic sa Facebook ang sari-saring puna at batikos. Agad na idinaing ang kawalan ng daang-tao sa tulay at ang maiksing abiso sa bayan. Iniinda rin ng marami ang pagtataas ng pamasahe at paghaba ng byahe dahil sa mga pagrereruta (Read Related Story: Tulay ng Saluysoy totally closed for construction). Umigting pa ang mga batikos nang bayan sa Munisipyo nang lumutang ang halaga ng tulay at naging kapuna-puna ang “mabagal” umanong pag-usad ng pagawain.

Kaugnay ng mga ito, sinabi ni Mayor Dualan na “mas nangingibabaw pa rin sa akin ang kapakanan ng nakararami dahil sayang ang pagkakataong ibinigay sa atin kaya sana naman hinay hinay lang ang panghuhusga ninyo sa akin. Sino ba namang nanunungkulan ang ayaw agad magawa ang isang proyekto na ang makikinabang ay hanggang kaapo-apuhan na natin? Mawala man tayo sa mundo ay nakatayo pa rin ang tulay na ito.”

Samantala, sa ilang pagkakataong pinagbawalan ng mga manggagawa sa tulay na kumuha ng litrato ang mga taga-Naic sa konstruksyon, mismong ang Munisipyo ang nagpost sa Facebook kahapon ng larawang kuha sa pagawain. Matutungahayn din sa mga larawan ang detalye ng proyekto na una nang hinahanap ng mga mamamayan. Ayon sa detalyeng tinatawag na “Construction/ Repair/ Improvement of Various Infrastructure Including Local Projects – Local Bridges – Construction of New Saluysoy Bridge, Sapa, Naic, Cavite” na may Project ID #18DG0056, nagkakahalaga ito ng 46,831,752 piso; at sinimulan noong Pebrero 6, 2018 at matatapos sa Marso 20, 2019.

https://www.facebook.com/plugins/post.php?href=https%3A%2F%2Fwww.facebook.com%2Fmunicipalityofnaic%2Fposts%2F744404199100700&width=500

Ang Tulay ng Saluysoy na nagdurugtong sa Sapa at Kanluran ay ang pangunahing nag-uugnay sa kabayanan at mga baryong kostal ng Naic. Sa tulay kalimitang dumaraan ang mga nagpaparoo’t parito sa Labac, Mabulo, Bancaan, Bagong Kalsada, Bucana Malaki , Sapa, at maging sa mga kakawing na baryo ng Ternate.

Paalala pa ng alkalde “sa mga nagpopost sa Facebook or Social Media, maging maingat po sana tayo bago magkomento lalong lalo na kung hindi natin alam o hindi tayo sigurado kung ano ang totoo. ‘THINK BEFORE YOU CLICK.’”

Panawagan ni Mayor Dualan, “muli po ang pakiusap ko magtulong tulong po tayong lahat para gisingin ang mga kinauukulan.” Ibinigay niya ang detalye ng mga kinuukulan: si Engr. Ariel Ferrer ng Hausland Construction (0905-751-2732); si De Arthur D. Pascual Jr., ang District 7 DPWH District Engineer sa DPWH Cavite Sub-District Engineering Office (046-860-3127/ pascual.arthurjr@dpwh.gov.ph); maging ang Contact Service ng Bayan o ang 8888 Presidential Complaint Center (8888/ http://www.contactcenterngbayan.gov.ph).

Sa huli, sinabi ni mayor na “nais ko rin pong ipabatid na anuman ang inyong tanong o hinaing sa ating lokal na pamahalaan ay maaari ninyong ipaabot sa akin ng personal o kaya ay sa aking opisina upang mapag-usapan o di kaya’y maipaliwanag ng maayos sa inyo ang problema.”

Advertisements

Local government on Saluysoy Bridge construction: “Paumanhin kung medyo nakakaabala ito sa ating mga mamamayan”

Marso 6, 2018 (Martes). Inihingi ng paumanhin ni Mayor Junio Dualan ang pagkakasara ng Tulay ng Saluysoy na nagdurugtong sa Sapa at Kanluran.

28740757_1696662720428621_1532235878_n

Ang isinarang Tulay ng Saluysoy. Kuha noong Marso 3, 2018, sampung araw mula nang isara ito sa publiko.

Sa mensahe ng alkalde sa buwanang pagtataas ng watawat sa liwasan kahapon ay humingi siya ng dispensa sa bayan. Ayon kay Mayor Dualan, “inihihingi ko ng paumanhin kung medyo nakakaabala ito sa ating mga mamamayan.” Sa kabila umano ng abalang dulot ng konstruksyon sa kasalukuyan, “ang makikinabang dito ay kanunununuan natin, kahit wala na tayo, habang buhay nariyan ang tulay natin,” ayon sa mayor.

Ang lumang tulay ay papalitan na umano ng siyam na metrong lapad at salubungang daang konkreto. Nagkakahalaga umano ito ng 50 milyong piso, bilang proyektong inilapit ng pamahalaang Naic sa tanggapan ni Senador Cynthia Villar.

Dama umano ng alkalde ang dinaranas ng mga taga-Naic na apektado ng tulay gayong siya man ay taga-Bancaan na lagian ding tumatawid sa Saluysoy. Gayunman, “matagal na itong hinahangad ng ating mga kababayan, lalong lalo na sa mga taga-baybay dagat.” Ang Saluysoy, bilang pangunahing nag-uugnay sa mga baryong kostal at kabayanang Naic ay siyang pangunahing tawiran ng mga nagpaparoo’t parito sa Labac, Mabulo, Bancaan, Bagong Kalsada, Bucana Malaki, Sapa, maging ng mga kakawing na baryo ng Ternate.

Inilahad pa ni Mayor Dualan ang kanyang matagal nang karanasan kung bakit hindi umano niya malilimutan ang Tulay ng Saluysoy. Minsan umano siyang naaksidente noon sa tulay kung kaya may tahi siya sa noo. Mula sa naturang aksidente, pinangarap na niyang maisaayos at maging bato ang tulay—mas matibay, malayo sa dating kahoy o metal na laging nasisira at delikado.

Bilang mga alternatibo, nagpasa umano ng resolusyon ang Sanggunian Bayan sa tunay na halaga ng pamasahe sa mga traysikel na nagbagong ruta. Binuksan din umano ang mga direktang byahe ng bangka mula Balsahan patungong Sapa at Bucana Malaki. Patuloy din umano ang pagpapalapad ng mga kasalukuyang dinaraanan sa mga bukid ng Gugo-Mabulo at Bulihan-Sapa.

Unang nagpaabot ng dispensa ang pamahalaang lokal sa pamamagitan Facebook Fanpage nito noong Pebrero 27. Ayon sa abiso, “Ang Saluysoy Bridge ay kasalukuyang isinasaayos ng Department of Public Works and Highways at Lokal na Pamahalaan ng Naic. Humihingi po kami ng paumanhin sa lahat, sa mga maidudulot nitong pansamantalang abala, humihingi din po kami ng paumanhin sa biglaang pagtaas ng singil ng pamasahe sa tricycle, pagkatapos naman po ng lahat na ito, ay isang pangmatagalang ginahawa para sa ating lahat. Maraming salamat sa inyong kooperasyon!”

Ayon kay Mayor Dualan, “gagawin sa loob siguro ng isang taon” ang Tulay ng Saluysoy. Matatandaang isinara sa publiko ang tulay noong Pebrero 22 (Read Story: Tulay ng Saluysoy totally closed for construction).

Tulay ng Saluysoy totally closed for construction

Pebrero 23, 2018 (Biyernes). Isinara na sa publiko ang Tulay ng Salusoy kahapon upang bigyang daan ang konstruksyong babago sa tulay.

28342556_1992889510751683_1962059308_o

Ang iba’t ibang anyo ng Tulay ng Saluysoy sa nakalipas na mga dekada.

Ipinaskil ang mga babala at nagtrend sa Facebook account ng mga taga-Naic ang tungkol sa pagsasara ng tulay noong Pebrero 15. Sa kabilaang dulo ng tulay ay mababasa ang babala, at mayroon din nito sa may liwasan. Ayon sa patalastas, “Effective February 22, 2018 Saluysoy Bridge will be totally close to traffic due to construction of new Saluysoy Bridge.”

Mabilis ang reaksyon ng mga taga-Naic hinggil sa naturang pagsasara. May ilang nagsasabing mahaba-haba sana ang abiso; o kaya ay huwag agad-agad ang pagsasara; habang may ilang sang-ayon gayong para rin umano ang konstruksyon sa inaasahang kaalwanan sakaling matapos ang tulay.

Naging mas maingay ang saloobin ng mga taga-Naic nang lubusan nang isarado ang tulay. Sa naturang pagsasara, maging ang mga naglalakad ay hindi na hinayaang makatawid taliwas sa mga nangyayari tuwing may pagkukumpuni o konstruksyon sa tulay. Kaugnay nito, agad na naramdaman ng mga madalas tumawid sa tulay, gaya ng mga mag-aaral at nagtatrabaho, ang epekto ng pagsasara.

Ang tulay ay ang pangunahing nagdurugtong sa kabayanan at mga baryong kostal ng Naic. Sa tulay kalimitang dumaraan ang mga nagpaparoo’t parito sa Labac, Mabulo, Bancaan, Bagong Kalsada, Bucana Malaki at Sapa.

Nagkaroon ng mga pagrereruta para sa mga papasok at lalabas sa mga nabanggit na baryong kostal. Ang mga manggagaling sa kabayanan o poblasyon ay daraan sa Soriano Highway, at papasok sa sementadong daan sa bukid palabas ng Mabulo. Ang mga palabas naman ng mga baryo, dadaan naman sa isa pang sementadong daang-bukid sa Sapa at lalabas muli sa highway.

Kasabay ng mga paghaba ng mga ruta ay ang pagtataas ng mga pamasahe sa traysikel. Sa isang paunawang inilabas ng Bancaan-Sapa Tricycle Operator and Driver Association, umakyat sa 20 pesos ang pamasahe para sa Bancaan pa-Naic at Sapa pa-Naic. Kasama sa tinutukoy sa Naic ang mga pa-Grand Central Terminal at Petron Gasoline Station sa Ibayo Silangan. Mas malaki naman ng limang piso ang mga mula Naic papasok sa Bancaan at Sapa sa presyong 25 pesos. Halos ganito rin ang bagong pamasaheng sinusunod ng mga pa-Labac, Bagong Kalsada, Bucana Malaki at Mabulo. Hindi lalayo sa 10 hanggang 15 ang pamasahe sa mga rutang ito noong hindi pa nagsasara ang tulay.

Sa kabila ng naturang paunawa, mula kahapon hanggang ngayong araw ay halos parehong 25 pesos na ang singil ng maraming tricycle driver palabas at papasok ng mga baryong kostal. Kaugnay nito, dumadaing ang mga mananakay sa halos 30 pesos na itinaas ng pamasahe mula sa dati ay 20 pesos na balikan. Dumadaing din ang ilang nagtatrabaho ng madaling araw dahil sa kadiliman ng ilang bahagi ng mga daan sa bukid. Mayroon ding pagpapalapad ng daang isinasagawa sa bungad ng daang-bukid sa highway na papasok sa Mabulo. Nagkalat din umano ang mga asong maaaring makakagat sa mga naglalakad, nagbibisikleta o dumadaan sa mga daang-bukid.

001

Byahe ng bangkang de-sagwan sa Balsahan-Latoria.

Upang makatipid, ilang mag-aaral at mga taga-baryo ang pinipiling sumakay sa bangka sa halip na sa traysikel. May mga byahe ang bangkang de-sagwan sa Bucana Malaki at Bucana Sasahan. May ruta rin ng bangkang de-sagwan sa Latoria pa-Balsahan. Parehong nasa dalawang piso ang pamasahe sa mga naturang byahe ng bangka. Ang ilang pa-poblasyon na nagmumula sa Bucana Malaki, pagdarating sa Bucana Sasahan ay sumasakay sa traysikel at nagbabayad ng pamasaheng 10 piso. May ilang naglalakad naman mula Bucana Sasahan pa-Latoria at muling sumasakay sa bangka upang marating ang Balsahan at naglalakad na lamang pa-kabayanan. Ayon sa ilang bangkero, kung sila ang tatanungin, imposible sa ngayon at hindi ganoong kadali managwan mula Balsahan pa-bukana gayong mahangin at minsan ay maalon. Ang mahabang ruta ng pagbabangkang ganoon para sa publiko ay maaari rin umanong mangailangan pa ng koordinasyon sa Coast Guard.

Samantala, puno naman ng katanungan ang maraming mga taga-Naic ukol sa isinarang tulay. Mababasa sa Facebook posts at maririnig sa mga usapan ang paghahanap sa nakapaskil na detalye ng pagawain. Sa panayam ng Naic Cavite Online (NCO) sa ilang construction worker kanina sa tulay, gagawin na umanong bato ang dating bakal na tulay. Palalaparin umano ito nang hanggang siyam na metro upang magkasya na ang salubungan ng mga daraang sasakyan. Natunghayan ng NCO ngayong araw ang paghawan sa mga puno at halaman sa mabanging bahagi ng mga dulo ng tulay. Ayon pa sa mga construction worker, lalagyan na rin umano ng riprap ang mga gilid na iyon ng bangin. Nitong hapon ay binabaklas na ang ilang bakal sa magkabilang harang sa gilid ng tulay. Wala ring malinaw na anunsyo sa ngayon kung gaano katagal isasara ang tulay.

28417509_1992889400751694_1659178552_o

Matutunghayang hinawan na ang masukal na bahagi ng bangin para sa pagbabago ng tulay. Kuha ang larawang ito ngayong araw.

Sa nakalipas na mga taon, natunghayan at naitala rin ng NCO ang mga pagbabagong pinagdaanan ng Tulay ng Saluysoy. Noong Oktubre 6, 2017, saglit na isinara ang tulay upang i-aspalto ang ilang metrong bahagi ng kalsada ng Sapa na karugtong ng tulay. Pebrero 15, 2016 naman nang tatlong linggong isara sa mga sasakyan ang tulay upang palitan ang metal nitong sahig. Bagaman pwedeng daanan ng tao, idinaing din noon ang pagtataas ng pamasahe dahil sa nagdodobleng sakay-baba sa kabilaang dulo ng tulay. Disyembre 17 hanggang 20, 2014 ay isinasara naman tuwing 11:00PM hanggang 5:00AM ang tulay para sa pagkukumpuni. Naging alternatibong daan noon ang Malainen Bago-Sapa NIA Road. Isinagawa namang bakal ang dating kahoy na tulay noong 2011. Sa nakalipas na maraming dekada, sinasabing makailang ulit na ring nasira at naipaayos ang tulay. Minsan pang nagkaroon ng hanging bridge upang maitulay ang Kanluran at Sapa nang bumagsak ang Tulay ng Saluysoy sa bigat ng isang dumadaang trak noong 1982. Minsan pang ininda ng tulay ang bigat ng mga sasakyan nang maging alternatibong ruta naman ito noong ang Tulay ng Kumbento naman ang ipagawa sa San Roque at Malainen, Agosto 2012.

Ang “saluysoy” ay pinaniniwalaang hango sa paglalarawan sa kilos ng tubig. May pagsaluysoy o tila pagbukal at pag-agos di umano noon ng tubig sa isang bahagi iyon ng Naic.

 

Fire razes iconic houses, business establishments in Naic

Abril 26, 2017 (Miyerkules). Ikinagimbal ng Naic ang pagsiklab ng sunog bandang 10:26 nang umaga sa mismong poblasyon nito. Tinupok ng apoy ang hilera ng mga kilalang bahay at establisyamento sa bayan.

apoy

Sa ulat ng ABS-CBN, nasa kalahating oras pa lamang umano ang sunog ay umakyat na ito sa ikalimang alerto. Napabayaang nakasinding kandila umano ang dahilan ng apoy na nagmula sa bahay ni Natividad Dy. Sa panayam ng TV Patrol kay C/Insp. Rene Bullos, OIC, BFP Cavite, sobrang init at mahanging panahon ang dahilan kung bakit mabilis kumalat ang apoy. Inabot ng sunog ang mga bahayan at establisyamento sa Kalye Zamora at Kalye Capt. C. Nazareno. Nasa 11 umanong bahay at anim (6) na establisyamento ang tinupok ng apoy.

Kasingbilis ng pagkalat ng apoy ay ang mabilis na pagkalat ng balita ukol sa nangyayaring sunog. Mabilis nagtrending sa Facebook ng mga taga-Naic ang ukol sa trahedya. Kabi-kabila ang mga larawang kumalat sa Facebook na nagpapakita sa anyo ng sunog. Inihatid din ng Naic Cavite Online (NCO) ang nangyayaring sunog sa pamamagitan ng Facebook live. Ilang bahagi ng NCO live video ang hiniram ng TV Patrol at TV5 para sa kanilang pagababalita.

Bukod sa dumagsang nagmasid, matutunghayan sa poblasyon ang tagpo ng mga lumilikas mula sa panganib na dulot ng sunog. Kani-kanyang alwas at labas ng mga gamit ang ilang bahay na nanganib sa pagkadamay na maabot ng apoy. Sa katunayan, ilang gamit pa ang nailikas mula sa matandang bahay na nasa itaas ng Mercury Drugs, kabilang ang antigong imahe ng Hesus Resurrecion na ginagamit ng Naic tuwing Linggo ng Pagkabuhay at Salubong.

Kaagad na inilikas ang mga taong nasa paligid ng sunog. Ang Mando’s Bakery na mapalad na hindi inabot ng apoy, bagaman katabi ng huling inabot ng sunog, ay nilisan kaagad ng mga bantay nito. Ganito rin ang nangyari sa Mercury na matapos lisanin ng mga mamimili at empleyado ay agad na isinara. Hindi naman na natapos ng marami ang pagkain sa katapat na Jollibee at lumikas kaagad ang mga kostumer at empleyado ng kainan. Buong araw nang itinigil ang operasyon ng fast food chain. Ang mga establisyamento sa Kalye Pascual Poblete na nagdurugtong sa Zamora at Capt. C. Nazareno, kaagad na nagpatay ng mga linya ng kuryente. Nagpanakbuhan sa mas malalayong bahagi ng Capt. C. Nazareno ang mga kawani ng Rural Bank at Bayad Center.

Makapigil hininga para sa marami ang ambang kakalat pa ang apoy. Ang mga establisyamentong nasa kahabaan ng Kalye Poblete, kaagad na naglipat ng gamit sa kabilang gilid ng kalsada. Napuno ng samu’t saring gamit ang kahabaan ng kalye mula sa mga negosyong patahian, computer shop, photo shop, kainan, botika, damitan, at iba pa.

Sa tila hindi maawat at naglalaking lagablab ng sunog, at sa nagdidiklapang mga linya ng kuryente, may ilang nag-uusal ng panalanging mahinto na ang sunog. May natunghayan ang NCO na isang babaeng nakataas ang kamay sa harap ng sunog at ipinagdarasal na mahinto na ito.

Sunud-sunod naman ang agarang pagrespunde ng mga bumbero, hindi lamang mula sa Naic, kundi maging sa iba pang bayan at syudad ng Cavite. Sa ulat ng TV Patrol, nasa 14 umanong trak ng bumbero ang umapula sa apoy. Kabilaang inapula ang apoy mula sa Zamora at Capt. C. Nazareno.

Sa bilis na pagkalat ng balita sa social media, natunghayan at nabatid din ng mga taga-Naic na nasa ibang mga bayan at bansa ang nangyayaring sunog. Nagpahatid ang mga ito ng panalangin, at ang iba ay kaagad na nagsitawag sa mga kamag-anak na pinangangambahang malapit sa pinangyayarihan ng sunog.

Kabilang sa mga nasunog ay ang halos dalawang linggo pa lamang na kabit na airconditioner at CCTV system ng isang establisyamento na nagkakahalaga umano ng 40,000 piso. Tinatayang milyun-milyon naman ang halaga ng nasunog na mga gamot at produkto sa Mercury Drugs. Ipinanlumo rin ng maraming nakatunghay kung papaano inabo ang mahigit 100 taon nang bahay na kinapupwestuhan ng Mercury. Naabo rin ang malaking bahay sa Zamora na ipinagbibili na ng isang bangko.

Sa tulong naman ng firewall at konkretong mga dingding at bubong, hindi nasunog at agad na nakabalik operasyon ang Red Ribbon bakeshop na nasa gitna ng mga nasunog na estbalisyamento.

Bandang ala-una na nang hapon nang maapula ang sunog. Sa kabila nito, maghapon at magdamag pa ring tinutukan ng mga bumbero ang sunog sa Naic dahil patuloy ang mga pag-usok, gaya na lamang ng mga nasunog na diaper sa Mercury; at manaka-nakang nagsisindi pa ang mga apoy.

Walang nasaktan o nasugatan sa malaking sunog na ito sa Naic.

Throwback: Pinakamalalaking kwento ng Naic nitong 2015

15

Ngayong 2015, muli pa ay ipinamalas ng Naic ang sigla sa pagpapayaman ng kultura at tradisyong kinagisnan. Kaugnay nito ay ang mga pagbabago at pangyayaring umukit na sa kasaysayang lokal, at inaasahang huhubog sa susunod pang panahon. Sa pagkakataong ito, muling tunghayan ang mga naitala at nasaksihan ng Naic Cavite Online sa iba’t ibang panig ng bayan sa nakalipas na taon.

SIMBAHANG KATOLIKA

Ang larawang ito ay kuha ng Naic Cavite Online nang maglibot ang popemobile matapos ang misa ni Pope Francis sa Quirino Grandstand.

Bilang isa sa mga pinakamaimpluwensyang institusyon, dama ng Naic ang mga pangyayari at pagbabagong sinuong ng Simbahan mula sa pinakamataas hanggang sa pinakalokal na antas. Kabilang na rito ang ilang araw na pagbisita ni Pope Francis sa Pilipinas noong Enero na nilahukan ng mga taga-Naic sa iba’t ibang lugar at pagkakataon. Saksi ang mga taga-Naic mula sa pagdating ng sinasakyang eroplano ng Santo Papa, hanggang sa “Encounter with Families” sa MOA Arena, pagpunta niya sa Leyte, pati sa pulong sa University of Santo Tomas, pangwakas na misa sa Quirino Grand Stand, maging sa mga pagdaan ng Santo Papa sa iba’t ibang kalsada |Read Story|View Pictures|. Ilang araw bago nagdalaw-pastoral si Pope Francis sa Pilipinas, nagdalaw-pastoral din sa Parokya ng Naic si Most Rev. Reynaldo Evangelista, Obispo ng Diyosesis ng Imus. Sinasabing ang ganitong pagdalaw ng obispo sa Parokya ng Naic ay huling naganap ilang dekada na ang nakalilipas. Nakipanayam siya at nakihalubilo sa mga opisyal ng mga samahang pansimbahan, sa mga nasa bilangguan sa Latoria, sa mga naninirahan sa lupa ng Simbahan sa Balon Pari, at sa mga batang tumatanggap ng feeding program sa Bucana Sasahan |Read Story|View Pictures|. Malaking pagbabago naman para sa mga parokyang nasa Naic ang regular na pagpapalit ng mga kura-paroko. Nitong 2015, pinalitan ni Fr. Isagani Aviñante si Fr. Virgilio Mendoza sa Parokya ng Naic; ni Fr. Frederick Tacderas si Fr. Monico Tagulao sa Parokya ng Sto. Niño de Bancaan; at ni Fr. Dingh Honrada si Fr. Orlando Jimenez sa Parokya ng San Isidro Labrador. Nagbunyi rin ang sambayanang Naic nang sa napakahabang panahon ay isa muling taga-Naic ang inordinahan sa pagkapari, at sa kauna-unahang pagkakataon ay isinagawa ang ordinasyon sa mismong bayan. Mayo 26 nang ordinahan sa Parokya ng Naic ang taga-Naic na si Fr. Ned Nazareno |Read Story 1| Read Story 2|. Bago naman ang pagwawakas ng taon, kumalat ang balitang pumanaw sa sakit ang dating kura ng Parokya ng Naic na si Fr. Nonilon Tibayan |View Pictures|.

PAMAHALAANG LOKAL

Tila iginuhit sa 2015 ang ilan sa malalaking desisyon ng pamahalaang lokal ng Naic na babago sa kasaysayan ng bayan. Naging daan ang “Ulat sa Bayan” ni Mayor Junio Dualan noong Setyembre sa plaza upang mapag-usapan ang iba’t ibang proyekto ng kaniyang administrasyon. Humatak ng matinding palitang-kuro ang libu-libong pabahay na itinayo at kasalukuyang itinatayo sa mga baryo ng Palangue Central, Halang, Calubcob at Sabang. Ang proyektong ito ng National Housing Authority ay tinanggap umano ng mga lokal na pamahalaan ng Cavite at Naic sa paniniwala nina Gov. Juanito Victor Remulla Jr. at Mayor Dualan na hindi aasenso ang isang bayan kung kakaunti ang tao. Sa patuloy na pagdating ng libu-libong bagong residente mula sa malalayong lugar, nagpahayag ng pangamba ang maraming taga-Naic sa maaari umanong pagkalat ng kriminalidad. Ilan sa mga pahayag nila ang mga sumusunod: “Pulitika ang pabahay na iyan, malaking problema iyan ng mga lehitimong taga Naic, dapat ang mga dadalhin mga ililipat sa pabahay sa nasabing mga Barangay ay matitinong pamilya;” “Sana nagkaroon man lang ng study bago inaprubahan to;” at “hindi sa pag dami ng taga boto (este mga tao) nasusukat ang pag unlad ng isang bayan. nasusukat ito sa pagpapahalaga ng kung anong mayroon tayo sa ating lipunan” |Read Story|. Samantala, isa umano sa tanong ng alkalde sa gobernador ay kung papaano ang kabuhayan ng mga magiging bagong residente ng Naic, at nangako naman ang huli sa pagdating ng mga mamumuhunan sa bayan ngayong taon. Kaugnay nito, naghugos nga ang Ayala Land Developers para sa pagtatayo ng isang light industrial estate sa Sabang. Tinatawag na Cavite Technopark, itatayo umano ito sa 118 ektarya ng lupang kayang magkaroon ng halos 50 pabrika. Inaasahan din umanong nasa 20,000 hanggang 25,000 empleyado sa darating na tatlo hanggang limang taon. Malaking usapin din ito sa Naic lalo na sa mga nangangailangan ng trabaho. Ilan sa mga pahayag nila ay ang mga sumusunod: “Sana priority mga taga naic lalo n ung lehitimo at botante na dito sa bayan ng Naic;” “maka pag for good na sa Phils, at makapag apply na;” at “Sana may ilaan silang work for certain age brackets, 20,30,40,and 50’s tulad sa ibang bansa. Kahit age 60 or over ay nabibigyan pa rin ng trabaho sa ibang bansa like japan and other asian countries. Sana sa naic mag umpisa ang ganitong palakad” |Read Story|. Bukod sa mga ito, idinetalye rin ni Mayor Dualan sa kanyang ulat sa bayan ang ukol sa mga programang panlipunan, iba pang negosyo, edukasyon, at budget.

SUNOG

11017668_701610089950244_6138450873484401607_n

Ang Aklatan ng Cavite State University Naic habang nilalamon ng apoy sa sunog na sumiklab noong Mayo.

Masaklap na trahedya ang kinaharap ng Naic nitong 2015 dahil sa sunod-sunod na sunog. Apat na buhay ang nawala at milyon-milyong halaga ng ari-arian ang tinupok ng apoy. Hapon ng Mayo 16, nagulantang ang mga taga-Bucana Malaki at Bagong Kalsada nang sa di malamang dahilan ay nag-apoy ang isang bahay sa lugar. Sa loob lamang ng 15 minuto ay nakaliban na ang sunog sa kadikit na bahay at katabing aklatan ng Cavite State University Naic. Higit sa may dalawang milyong halaga ng aklatan, bukod pa sa dalawang bahay na naabo, nagluksa ang Naic sa pagkamatay ng tatlong tao sa bahay na pinagsimulaan ng apoy. Isang mahigit 40-anyos at dalawang batang edad 5 at 2 ang mga biktima |Read Story|View Pictures|. Madaling araw naman ng Agosto 3, nagising ang mga taga-Labac sa hiyawang nasusunog ang isang bahay na katapat ng Barangay Hall. Isang limang taong bata rin ang hindi nakaligtas sa sunog. Samantala, matapos ilibing ang biktima ng sunog sa Labac noong Agosto 5, bandang ika-11 ng umaga, malaking sunog naman ang sumiklab sa likod ng simbahan ng Naic, sa pook na tinatawag na Balon Pari, sakop ng GomBalZa. Tinatayang nasa 11 kabahayan ang inabot ng apoy na tumupok sa may dalawang milyong halaga rin ng ari-arian |Read Story|View Pictures|. Pasado hatinggabi naman ng Abril 3, pa-Biyernes Santo, nang matupok din ang isang bahay sa San Roque.

AMIRA MEDINA

02

Si Amira habang inaawit ang Wrecking Ball para sa kanyang blind audition sa The Voice Kids.

Ikinarangal ng Naic ang matagumpay na paglahok ng batang si Amira Medina sa The Voice Kids (TVK) ng ABS-CBN. Hulyo 12 nang iere ang pagkakapanalo ni Amira sa blind audition ng TVK. Matatandaang sa bersyon ni Amira ng kantang Wrecking Ball noon ay agad na umikot ng upuan si Bamboo na saglit pa ay halos sabay na sinundan nina Sarah Geronimo at Leah Salonga. Pinuri ng mga hurado ang lalim at maturity ni Amira sa pagkanta. Noong Agosto 1 naman ay iniere ABS-CBN ang battle round ng TVK kung saan nakalaban ni Amira ang dalawang kasama sa Team Sarah na sina Andrew Patuastic at Owen Gonzaga. Kinanta nila ang Keep Holding On. Nanalo muli si Amira na nagpausad sa kanya hanggang sa singoffs na isinahimpapawid noong Agosto 16. Bagaman hindi na nakalusot sa naturang round, naging abala si Amira sa iba’t ibang guesting sa ABS-CBN at ilang appearances sa ilang probinsya |Read Story|.

SA TELEBISYON

11998814_752502774860975_4347496257828696863_n

Ang “Happy Truck ng Bayan” ng TV5 sa Naic noong Setyembre.

Hindi lamang ang pagbida ni Amira Medina sa The Voice Kids ng ABS-CBN ang naging daan upang matunghayan ng mas maraming mga manonood ang tungkol sa Naic. Marso 18 nang itampok sa programang “I Juander” ng GMA NEWS TV Channel 11 ang taal na pagkaing-Naic, ang sinudsod. Oktubre 21 nang sa “I Juander” muli ay itampok naman ang isang horror story mula sa di umano ay manikang sumasanib sa Kalye Pelaez, Kanluran |Read Story|. Nitong Setyembre naman, dinala ng TV5 ang programa nitong Happy Truck ng Bayan sa Naic. Dinayo ng mga taga-Naic ang taping nito sa plaza kasabay ng pagdating ng mga malalaking bituin ng TV 5. Kabilang sa Happy Truck ng Bayan sina Ogie Alcasid, Janno Gibbs, Derek Ramsay, Gelli de Belen, Mariel Rodriguez-Padilla, Jasmin Curtis-Smith, Empoy, Tuesday Vargas, Kim Idol, Eula Caballero, Martin Escudero, Alwyn Uytingco, Ritz Azul, Valeen Montenegro, Toni Aquino, Tom Taus, Mark Neumann, Shaira Mae, Akihiro Blanco, Chanel Morales, Sophie Albert at Vin Abrenica. Ayon sa mga host ng programa kakaiba umano ang sigla ng mga taga-Naic. Ayon kay Derek Ramsay, sa dami ng napuntahan nila, ang mga taga-Naic ang may pinakamataas na energy. Bukod sa kasiyahan, namigay rin ang programa ng mga papremyo sa mga taga-Naic |View Photos|. Samantala, nagsadya ang mga programa ng ABS-CBN sa Naic upang magpa-audition sa bayan noong Nobyembre 3. Nilahukan ng maraming taga-Naic ang audition para sa Pilipinas Got Talent. Karaniwang kumanta at sumayaw ng solo o grupo ang mga taga-Naic. Marami rin ang pinalad na makapag-audition sa mismong ABS-CBN habang ang ilan ay sumabak pa sa isang audition kinabukasan sa Dasmarinas, Cavite. ipinatalastas din sa sa Naic na may audition din noong araw na iyon para sa isang segment ng It’s Showtime! Ipinatalastas din sa sa Naic na may audition din noong araw na iyon para sa isang segment ng It’s Showtime!

LANDMARKS

12096638_412732272267896_9157839017644068139_n (1)

Ang bagong dalawang kalabaw na may dalawang ulo bilang palatandaan ng Naic.

Isinilang ngayong 2015 ang ilang landmark na inaasahang magiging tatak-Naic. Isa sa mga pinakapinag-usapan ang pagpapagawa ng kalabaw na may dalawang ulo. Matatandaang mula dekada ’70 hanggang ’90 ay naging palatandaan na ng Naic ang rebulto ng kalabaw na may dalawang ulo sa plaza nito. Upang ibalik umano ang alaala at upang maging pagkakakilanlan muli ng Naic, nagpagawa ng bagong rebulto ng kalabaw na inilagay sa pinagsangahan ng Ibayo Silangan sa tapat ng Petron Gasoline Station |Read Story|. Naglagay rin ng mga monumento nina Andres at Procopio Bonifacio sa kung saan sila ibinartolina noon sa Casa Hacienda de Naic o Naic Elementary School |Read Story|. Naging kapansin-pansin din ang pagkakaroon ng mga electronic billboard sa Naic, una sa may plaza |Read Story|, na sinundan ng sa may ABC Hall na mula umano sa donasyon ng mga taga-Naic na nasa America, at pinakahuli ay ang sa tanggaan ng Turismo, sa kung saan naroon din ang kalabaw na may dalawang ulo. Samu’t saring pagbati at patalastas ang matutunghayan sa mga e-board ng bayan na nagpabawas din umano sa paggamit ng streamers sa Naic.

KRIMINALIDAD

Bagaman tahimik at patagong pinag-uusapan sa Naic, tuluyan nang pumutok ang balita ukol sa malalaking kwento ng krimen di umano sa bayan nang ibalita ng GMA News ang ilan sa mga ito. Ayon sa ulat ng “News to Go” noong Agosto, sinalakay ng otoridad ang ilang bahay ng matataas na opisyal sa upland barangays ng Naic. Nasabat umano ang malalakas na armas sa mga bahay ng ilang kapitan ng bayan. Ini-ugnay rin ng ulat ang naturang mga armas sa serye ng patayan sa Cavite, partikular umano sa pagpatay sa isang kapitan ng Naic noong Hunyo |Watch Video|. Kabilang naman ang Naic sa sampung target areas na sabay-sabay sinalakay ng otoridad sa Cavite nitong Nobyembre. Ayon sa ulat ng “24 Oras,” isa sa 25 nadakip ay ang itinuturing na 3rd Most Wanted ng Naic. Ini-uugnay sa pagsugpo umano sa mga iligal na armas at droga ang naturang raid |Watch Video|.

HALALAN 2016

Kaugnay ng magaganap na halalan ngayong 2016, nakilala na ng Naic ang mga tatakbo sa mga posisyong lokal matapos ang pasahan ng Certificate of Candidacy sa tanggapan ng Comelec sa Naic. Tatakbo sa Konseho, sa ilalim ng Partido Magdalo, dala ng United National Alliance, sina Konsehal Cesar Ryan Nazareno, Konsehal Anita Carta, Konsehal Sofia Motas, Konsehal Rodolfo Villar, Konsehal Napoleon Nazareno, Konsehal Maximo Dagasdas, ABC President Cesar Loyola Jr., at dating Konsehal Ferdinand Wakay. Tatakbo pa ring bise ng naturang partido si Vice Mayor Rodrigo Castillo |Read Story|. Tatakbo rin para sa Konseho, sa ilalim ng National Unity Party, sina Konsehal Erwin Cuartero, dating Balsahan Chairman Gerald Sugue at Rollie Jan Hinahon. Kasama nilang tatakbo para sa pagka-bise si dating Konsehal Roger Pangilinan |Read Story|. Tatakbo rin bilang mga independienteng kandidato para sa Konseho sina dating Konsehal Romy Buenaflor at Nikko Pagdanganan |Read Story|. Independiente ring tatakbo bilang bise si Konsehal Joy Unas-Paras |Read Story|. Wala namang makakalaban ang nakaupong si Mayor Junio Dualan ng Partido Magdalo. Kaugnay ng nalalapit na halalan, naging madalas ang pagbisita ni Vice President Jejomar Binay sa Cavite, kasama ang Naic, nitong 2015. Tatakbong pangulo si Binay. Samantala, naging panauhin pa sa Alay Lakad ng Naic ang tatakbong Senador na si dating MMDA Chairman Francis Tolentino |Read Story|.

IGLESIA NI CRISTO

11923014_1021664727874171_836361475_n

Ang ilang miyembro ng Iglesia ni Cristo sa kanilang idinaos prayer vigil laban umano sa panghihimasok ng pamahalaan sa kanilang Iglesia.

Aktibo ang mga miyembro ng Iglesia ni Cristo sa Naic sa kanilang pakikiisa at pagdiriwang sa ika-100 anibersaryo ng kanilang Iglesia. Kabilang din sila sa nakilahok upang manindigan para sa kanilang pananampalataya. Agosto 28 nang ilang taga-Naic na ang nagtungo sa Maynila upang magtipon sa harap ng tanggapan ng Kagawaran ng Katarungan. Ito ay upang labanan umano ang panghihimasok sa kanila ng pamahalaan. Nadagdagan pa ang bilang ng mga taga-Naic na lumahok sa pagtitipon na umabot hanggang sa EDSA. Tumagal ito hanggang Agosto 31 |Read Story|.